1 Job in hetih bangin thurel hlaihlo i:
2 “A bo zo hla te le Pathian ai
i sik awng de khiah zaitluk in ngaai ing.
3 A mai-inn khiah i lu vumah vaar ai,
amah vaarhnak thawn khuathim lakah i vaak fangin,
4 Kaimah khiah i cak rauh awng teng fang le
Pathian thawn kin rualremhnak in
i innkua khiah hmuifu i bur awng fangin,
5 A Cungnung Pathian khiah
i hnenah um awng fang in,
i fate khiah i hiangah um awng fangin,
6 I lampui khiah cawhnawi tar thawn khuk ai
lungto songin oliv thau khiah
kai ca in runti bangin luang awng fangin,
7 Khua pua ai kawl dawngkham ah
i kawi awng fangin,
mizapui tualvan ah i to awng fangin,
8 Tlangvalte in i hmu fangin lam i pial i.
Patarte in tho ai ding i.
9 Mi upate in pong awl ai
amahte kaa khiah amahte kut in hup i.
10 Mi upate in pong awl in dapsut in um ai,
amahte lei khiah a karuh ah taang lio i.
11 I ponghnak zatute in thang i phat i.
I hmu tu te in i lakah lungkhim i.
12 Zaimanti fangin i hnenah kaptu mi farahte le
paa nailote le bawm tu nai lo te khiah
kaimah in luat ruai manin
13 A thi rianro pa hmuifu khiah i hnenah hleng i.
Hmaitong nuu khiah ang in lasa ruai ing.
14 Dikcanghnak khiah pon bang in sil ing.
A hman ai i thukhanhnak khiah
angki saupui le lupawng bang in sil ing.
15 Mitcaw te ca ah amahte mit cang awng ing.
Kawngbaite ca ah amahte ke cang awng ing.
16 Mi farahte ca ah a paa i awng ing.
I ling lohnak mite thu khiah sii sah awng ing.
17 Misualte haa khiah ek sah ai
amahte kaam songin amahte dawphnak mite khiah
luangsuah ing.
18 Ciafangin kaimah in,
“I inn ah thi ngang.
I nunhnak khiah runsiat zah in tam i.
19 I hnuk in ti te khiah ban i.
I kaak vumah naidawh khiah zanvar tla i.
20 I thangphathnak khiah
i songah a thar in um tio i.
I kut ah kahpuk thar khiah sin tio ing.’ ti in ti ing.
21 Mite in i thurelhnak khiah dapthen in ngaai i.
22 I pong ben fangin amahte in
pong tuh dang nai lo i.
I pon khiah amahte bil songah naidawh bang in tla i.
23 Ruah sarha iang bangin amahte in i iang i.
Fur ai ruahti bangin i ponghnak khiah amahte in ding i.
24 Amahte khiah hnihsan lengkhaw,
amahte in sang lo i.
I hmaizal khiah amahte in umm rauh i.
25 Amahte lampui khiah ril sah ai,
amahte uktu bang in to ing.
Raalkapte lakai kumpibawipa bangin um ai
mi lungsiate khiah thinnuam ruaitu bang in
um awng ing.