Job 20

<<  JOB 20  >>

1  Ciafangin Naamath mi Zophar in,

2  “I ruathnak khiah hnaihnok manin na sawn tuh ing.
Ziangmanti fangin, thin i ang-aa bial  i.

3  I hau manin zauh i suamhnak khiah za ing.
  I linghnak manin na sawn tuh ing.

4  Hlanlai ai panin canghnak thu khiah ling zo i
Laivum ah minung um khelleh in,

5 mi sualte anghnak khiah campuikhat lek i.
Pathian linglo te anghnak khiah camalak i.

6  A hngalhnak khiah van tianin saang in
a lu in mairote khiah ban rin in,

7  kumzangza in amah khiah a ek bang in thi tuh
A hmu awng tute in,
‘Amah khiah akonah i pa?’ ti in ti tuh i.

8  Mang bang in amah khiah zuang tuh teu ai tawk tuh lo i.
Zanlai ai mithla ah hmuhnak bangin
amah khiah hnawt tuh teu i.

9  Amah hmu tu mit in amah khiah hmu leh tuh lo
A umhmun in khai amah khiah hmu  tuh nawn lo i.

10 A fate in mi farahte te bawm ruai leh tuh i.
A kut in a naihhnak thilri khiah pe leh tuh i.

11 A ruhte khiah a naupang lai ai tha thawn dim i.
Ikhalselai amah thawn laivut songah taal tuh i.

12 A pha lo khiah a kaa songah hluum
napuikhaw, a lei hnia ah thup khalselai,

13 A kaa songin suak ruai tuh  nuam lo in
a ka songah pai hlen ta in khai,

14 a rong khiah a pum songah thur tuh meng i.
Amah songah rul thihsi bangin cang tuh i.

15 Thilri tamngai khiah amah in lem tuh napui ai,
awk leh tuh i.
Pathian in a pum songin khawlh sah tuh i.

16 Amah in rulte thihsi khiah duut tuhai,
rul haa in amah khiah rek tuh i.

17 Khoiti le cawhnawitar luanghmun
run le rawnte khiah amah in hmu tuh lo i.

18 A naper hnak khiah ei lo pah in sa leh tuh i.
Amah in lem tuh lo i.
A thil zuarhnak ai a miat ngahhnak khiah
ang ngai in hmang tuh lo i.

19 Ziangmanti fangin, amah in mi farahte khiah
nemh ai zam sek i.
Amah ai sa lohnak inn khiah a khengkhebel in
long sah lio i.

20 A thin songah thinnuamhnak um lo manin,
a naihhnak in amah khiah o tuh lo i.

21 Amah ei tuh in zaikhai taang tuh lo i.
Ciamanin a nunnuamhnak khiah a raipui raai tuh lo i.

22 Thil tamngai nai tuh napui ai,
amah khiah thinthip in um tuh i.
Rimsuhnak hmuahhmuah in amah khiah tawng tuh i.

23 A rongkham dawn fangin, Pathian in a
thinrawhnak khiah  amah vumah ap tuh i.
Rong a ei laitak in a vumah ruah bang in sii tuh

24 Maithal hmunin tlan tuh napui ai,
dar conkiang thawn amah khiah hlehpet in kap tuh i.

25 Cia conkiang  khiah amah songin phok leh tuhai
a nikkha songin a conkiang lu khiah suak tuh i.
Amah khiah lau rauh tuh i.

26 A naihhnak vumah khuathim tuh meng i.
Zaap lohnak mai in amah khiah kang tuh i.
A buk songai taang tu pa khiah amah thawn
kang tuh ve i.

27 Vancung in a sualhnak khiah larruai tuhai,
laipua in amah khiah tawng tuh in tho tuh i.

28 Hor in a inn khiah lan sah tuhai,
Pathian thinrawhnak nia ah a naihhnak khiah
lan tuh berh i.

29 He khiah Pathian hnenin mi sualte ca ai dahhnak i.
Amahte in co tuh ai Pathian in bawnhnak ro i.” ti in sawn ai rel i.

<<  JOB 20  >>