Job 1

<<  JOB 1  >>

1Uz ramah Job tihnak mi pakhat lo um awng i. Amah khiah mawhhluk tuh nai lo mi dikcang le Pathian kih tu mi i ai a pha lo hmunin tlan thai minung i. 2Amah in fapa pa sarih le fenu pathum nai i. 3Cen amah in tu thawng sarih, kala-uk thawngthum, kawlpaw cang thawngkhat, lak nu zanga le hnenum tam ngai nai manin amah khiah Nisuak hmunlam ram ah mi lian ber i.

4A fapate in amahte inn ten ah amahte can bang in puai bawn tlang de ai a farnute khiah ei tuh le ding tuhin ko de i. 5Ciamanin a puaite ben sio fangin Job in amahte khiah ko ai cianghlim ruai de le amahte veksen ca in a khim in zingniu in tho ai mai thawn taihnak a hlu khiah hlu sah de i. Ziangmanti fangin Job in, “I fapate in lo sual in Pathian khiah amahte thin songin awrsia cam ngah thai pang i.” ti in ruat i. Ciatih bangin Job in a catlo lo in bawn de i.

6Ni khat nia ah Pathian fapate khiah Bawipa hnen ah khawm tlang ai Satan khai amahte thawn kawi ve i. 7Ciafangin Bawipa in Satan hnenah, “Konin hleng i pa si?” ti in zawt i. Ciamanin Satan in Bawipa khiah, “A lik a lak i vakhmun laivum in hleng ing.” ti in sawn i. 8Ciafangin Bawipa in Satan hnenah, “I hnenum Job khiah ling aw sim? Amah bangin mawhhluk tuh um lo mi le mi dikcang le Pathian khiah kih ai a pha lo hmunin tlan thai minung pakhat bang khai laivum ah um lo i.” ti in ti i. 9Ciamanin Satan in Bawipa khiah, “Job in Pathian khiah a lovang in kih i awm? 10Amah le a innkua le a naihhnak hmuah cingkim in sen thawn kulh sah i lo i sim? A kut ai perhnak khiah hmuifu bur sah ai a ram songah milian cang ruai i lo i sim? 11Ikhalselai a naihhnak vumah na kut in tok sah tulai, na hmai ah awrsia na cam tuh rori i.” ti in sawn i. 12Ciamanin Bawipa in Satan hnenah, “Amah naihhnak hmuah a veksenin na kut songah na ap sah ing. Amah pum rori zong tok sah mah.” ti in sawn i. Ciafangin Satan khai Bawipa hnenin suak i.

13Ni khat nia ah a fapate le a fenute khiah a fa upaber inn ah ei le capittizu ding in um tlang i. 14Ciafangin a hnenum pakhat khiah Job hnenah, “Kawlpaw cangte thawn lovai ai lakte khai amahte hiang ah hampa ei in um teng fangin, 15Sabe mite in kin rok ai kawlpaw le lakte khiah kin lang sah sio ai na hnenumte khai a veksenin vangsau thawn rek sio ai kaimah lek he thu na than tuhin i taang i.” ti in rel i. 16Ciatih ai a pong laitak in, a dang hnenum pakhat khai hleng ai, “Vancung in Pathian mai khiah tlok ai na tu te le na hnenumte khiah kang sio ai kaimah lek he thu na than tuhin i taang i.” ti in rel i. 17Ciatihin a pong laitak in, a dang hnenum pakhat khai hleng leh thio ai, “Khaldea mite khai pawl thum in hleng ai na kala-ukte khiah na lang sah sio ai na hnenumte khiah vangsau thawn rek sio ai kaimah lek he thu na than tuhin i taang i.” ti in rel i. 18Ciatih in a pong laitak in, a dang hnenum khiah hleng leh thio ai, “Na fapa le na fenute khiah na fapa upaber inn ah ei le capittizu ding in um teng in, 19nelrawn songin khuahu pui khiah hleng vut ai inn khiah a ningli in seu ai na fate vumah tlok ai amahte khiah thi berh i. Kaimah lek he thu na than tuhin i taang i.” ti in rel i.

20Ciafangin Job khai tho ai a thilthuam khiah zik ai a lu khiah met ai laipua ah bok ai Pathian khiah bia ai, 21“I nuu pum songin kawngkolh in i te i. Ciataah kawngkolh in let leh tuh ing. Bawipa in i pe ai, Bawipa in lang leh sio i hang. Bawipa hming khiah hmuifu tu seh.” ti in sawngen i. 22Hete lakah Job in sual lo ai Pathian khai mawhhluk lo i.

<<  JOB 1  >>