Ezekiel 40

<<  EZEKIEL 40  >>

1Kin thawngtla khelleh kum hlainih hnak, hla hmasaber ni ha nia, Jerusalem khiah raalte in neh awng khelleh kum hlaili kumah, cia nia BAWIPA kut khiah i vumah um ai, BAWIPA in Jerusalem ah i kawih i. 2Mang le hanrawl bang in Pathian in kaimah khiah Israel ramah i kawih ai mual saang ngai vumah i tauh i. Cia mual hlanglam ah khuapui bang pakhat um i. 3Pathian in ciata ah i kawih ai ciata ah mi pakhat um i. Amah khiah dar thawn bang i. Cia pa in a kut songah rihual pakhat le thil tehhnak tokrolh pakhat sin ai kawldawngkham ah ding i. 4Ciafangin cia pa in i hnenah, “Mi fapa, na mit thawn sik in na bil thawn ngai tulai, kaimah ai na hmuhhnak hmuah khiah a phan ngai in sik tu. Ziangmanti fangin kaimah in hete na hmuh tuhin heta ah na kawihhnak i. Na hmuhnak hmuah khiah Israel mite hnenah rel tu.”ti in i rel i. 5Ciateng in temple khiah a pualam ah a cingkim in sen thawn ren i. Cia pa kut song ah thil tehhnak tokrolh dong ruk sau um ai cia dong khiah dong khat le kutzapek ten sau i. Amah in cia temple renhnak sen khiah teh ai dong ruk kau ai dong ruk sang i.

6Ciafangin amah khiah kawldawngkham lamah kawi i. Cia kawldawngkham khiah nisuah hmunlam hoi i. Ani khai kaipum in kai ai cia kawldawngkham khiah dong ruk kau ai a khat ta khai dong ruk kau i. 7Cen dawngkham kilhmun khaan khai dong ruk sau ai dong ruk kau i. Cia dawngkham kilhmun laklawh khiah dong nga kaang i. Cen a songta lam dawngkham khai dong ruk kau i. 8Cen amah in a songta lam dawngkham khai teh ai dong ruk i. 9Cen amah in kawldawngkham a songlam ai kawka khiah teh ai dong riat thuk i. Dawngkham khuam te khai dong nih i. 10Nisuah hmunlam kawldawngkham ah dawngkham kilhmun khaan pathum khatlam ah um ai a khatlam ah khaan pathum um i. Cia khaan pathum khiah a veksen in a tia ten i. 11Kawldawngkham luthmun khai amah in teh ai, dong ha kau i. Cen dong hlaithum sau i. 12Dawngkham kilhmun hmai ah kualawng um ai dong khat sau ai dong khat kau i. Cen dawngkham kilhmun khiah dongruk kau ai dong ruk sau i. 13Ciafangin amah in cia kawl dawngkham khiah dawngkham kilhmun innphu in a dang dawngkham kilhmun innphu tian teh ai dawngkham pakhat in a ral ai dawngkham tian dong kul hluan nga kau i. 14Amah in dawngkham khuamte khiah teh ai dong sawmtuk sang i. Kawldawngkham hiang cingkim ai tualvan khiah dawngkham khuam tian ban i. 15Kawldawngkham lut hmunin a songta dawngkham tualvan tian khiah dong sawm nga i. 16Dawngkham kil hmun bangkhang vum ah le kawl dawngkham bangkhang vumah padinpauhte um ai cia padinpauhte khiah a pualam tahin a songlam khiah cik sawn i. Cia dawngkham khuam vumah ungti zuk um i.

17Ciafangin a puata tualvan ah i kawih i. Ciata ah lungtlep thawn bawnhnak lampui um ai cia lampui vumah inn khaan sawmthum khai um i. 18Cia lampui khiah a hniata sawn lampui i ai kawldawngkhamte hiang ah i. A kau lam khiah kawldawngkham saulam cam i. 19Ciafangin amah in a hniata dawngkham hmai in a songta tualvan hmai tian khiah teh ai, nisuah hmunlam le saklam ah dong zakhat i.

20A puata tualvan ah kawldawngkham pakhat um ai saklam hoi i. Amah in a saulam le a kaulam khiah teh i. 21Cia dawngkham ah dawngkham kil hmun khaan pathum khatlam ah, a khatlam ah khan pathum um i. A khuamte le a kawkka te khai a hmasa dawngkham bang in dong sawm nga sau ai dong kul hluan nga kau i. 22A padinpauhte le a kawkka le a ungti zukhnak khai nisuah hmun lam hoi tu dawngkham zah i. Cia dawngkham khiah kaipum kal sarih thawn kai i. A kawkka khai a hmai ah um i. 23Ni suah lam ai kawl dawngkham bangin, saklam kawl dawngkham hmai ah a songta tualvan dawngkham um i. Amah in kawl dawngkham pakhat le pakhat laklawh khiah teh ai dong zakhat i.

24Ciaben fang in cia pa in hlanglam ah i kawih ai, ciata ah kawldawngkham pakhat um ai cia kawl dawngkham khiah hlanglam hoi i. Cia pa in cia dawngkham khuam le a tualvan te khiah teh ai, a dang dawngkham te thawn cam vek i. 25Cia dawngkham le a tualvan cingkim ah padinpaukte khiah a dang dawngkham te bang in um i. Dong sawm nga sau ai dong kul hluan nga kau i. 26Cia dawngkham hmai ah kaipum kal sarih um i. A kawkka khiah cia kaipum khatlam ah um i. Cen dawngkham khuam vumah ungti zuk khiah he lam khuam le khatlam khuam vum ah um i. 27 A songta tualvan in khai dawngkham pakhat nai ai cia dawngkham khiah hlang lam hoi i. Amah in he dawngkham in sumpua ai hlanglam dawngkham khiah teh ai dong zakhat i.

28 Ciafangin amah in hlanglam dawngkham in a songta tualvan ah i kawih i. Amah in cia hlanglam dawngkham khiah teh ai, a dang dawngkham te thawn camra i. 29A dawngkham kilhmun khaan le a dawngkham khuam te le a kawka te khai a dang te thawn camra i. Cia dawngkham le a kawkka ah a cingkim in padinpauh um i. Cia khiah dong sawm nga sau ai dong kul hluan nga kau i. 30A cingkim ah kawkka um ai dong kul hluan nga sau ai dong nga kau i. 31A kawkkate khiah a puata tualvan lam hoi ai a dawngkham khuamte vumah ungti te um i. Cia kaw dawngkham khiah kaipum kal riat thawn kai i.

35Ciafangin amah in saklam kawldawngkham ah i kawih ai a dang kawl dawngkham te bang in teh ai a dang dawngkham te thawn zah vek i. 36Dawng kham kilhmun khaan te, a khuam te le a kawkka te khai teh i. A cingkim in padinpauh um ai, a saulam khiah dong sawm nga i ai a kaulam khiah dong kul hluan nga i. 37A dawngkham khuam te khai a puata tualvan lam hoi ve i. A dawngkham khuam khatlam le khatlam te vumah ungti te um ai kawl dawngkham khiah kaipum kal riat thawn kai i.

38Ciata ah khaan pakhat um ai a lut hmun khiah kawldawngkham khuam song in lut i. Ciata ah mai thawn taihnak a hlu khiah amahte in som i. 39Kawldawngkham donsuk ah a khatlam le a khatlam ah cabuai panih veve um i. Cia cabuai vumah mai thawn taihnak a hlu le sualhnak ca ai a hlu le khelhhnak ca ai a hlu te rek hmun i. Saklam kawldawngkham luthmun hiang ai donsuk pualam ah cabuai panih um i. Cen donsuk khattalam ah cabuai panih um i. 41Dawngkham hiang ah khatlam le khatlam ah cabuai pali veve um ai cia cabuai pariat vumah raithawi hnak a hlu khiah rek hmun i. 42Cen mai thawn a hlu tai hmun tuh in lungto cabuai pali um ai dong khat le a hrek sau ai, dong khat le a hrek kau ai dong khat saang i. Cia cabuai te vumah mai thawn taihnak a hlu le raithawi hnak a hlu te rek hnak tuh vang te zau i. 43A songah kutzapek tia huk te khiah a cingkim in pen i. Cabuai te vumah raithawi hnak sapheng um i.

44A songta kawldawngkham pua ai a songta tualvan ah lasatu te umhmun khaan um i. Pakhat khiah saklam kawdawngkham hiang ah um ai hlanglam hoi i. Pakhat khiah hlanglam kawldawngkham hiang ah um ai saklam hoi i. 45Ciafangin amah in i hnenah, “He hlanglam hoi hnak khaan khiah temple kiltu phungki te umhmun i. 46Cen saklam hoi hnak khaan khiah awlta cabuai kiltu phungki te umhmun i. Hete khiah Levi fapa te hmun ai suakhnak Zadok fapa te i. Amah khiah BAWIPA nong ah kawi ina na per tu te i.”ti in i rel i.

47Ciafangin amah in tualvan khiah teh ai dong zakhat sau ai dong zakhat kau ai a ning li in a cam vek i. Awlta cabuai khiah temple hmai ah um i. 48Ciafangin amah in temple donsuk ah i kawih ai cia donsuk ai dawngkham khuam khiah teh i. Khatlam khiah dong nga i ai a khatlam khiah dong nga i. Cen kawl dawngkham khai khatlam khiah dong thum i ai a khatlam khiah dong thum i. 49Cia donsuk khiah dong kul sau ai dong hlaikhat kau i. Cen cia donsuk kaihmun kaipum hiang ai dawngkham khuam hiang khatlam le khatlam ah khuam te khai um i.

<<  EZEKIEL 40  >>