Ezekiel 30

<<  EZEKIEL 30  >>

1BAWIPA thu khiah i hnenah hleng leh thio i. 2BAWIPA in: “Mi fapa, prawfet thu khiah, ‘BAWIPA Pathian in: “ ‘Tunnia khiah a siava i.’ti in kap tu.

3  A niakhua khiah nong i hang.
BAWIPA niakhua khiah nong i hang.
Mairo kaai niakhua i.
Zental mite hnophnak cuu i.

4  Izip ramah vangsau hleng tuh i.
Ethiopia vumah thin rimsuhnak hleng tuh i.
Izip ramah mite khiah rek in thi fangin,
amahte naihhnak thilri khiah lang sah tuh berh ai,
A sa hmun a ham khiah bal sah tuh berh i.

5Ethiopia, Libia, Lidia, mi phun caang le, Chub le amahte thawn tangkhat tu te khiah amahte thawn vangsau in rek tuh i.”ti in rel i.

6  ‘BAWIPA in: “Izip bawm tu te khiah sung tuh i.
Izip ai a hngalhnak a tha khai nau tuh i.
A ram songai umtu mite khiah
Mikdol ai panin Syene tianin vangsau thawn thi tuh i.”
ti in BAWIPA Pathian in rel i.

7  Amahte khiah khiah zaikhai bek lo ai
hnawmhnak ram dang te bang in zaikhai
bek lo in hnawm tuh i.
Cen a khuapuite khai a hnawmsa
a dang khuapuite bangin hnawmcan tuh i.

8  Izip ram khiah mai thawn i tai fangin le

   A bawmtu te khiah a veksenin i hnawmcan fang in, amahte in kaimah khiah BAWIPA i, ti ling tuh i.

9Cia nia ah i hnenin nalaangte khiah a ngulsul ai umtu Ethiopia mite khiah lau ruai tuhin hlat tuh ai Izip hnawm nia ai bangin amahte vumah thin rimsuhnak hleng tuh i. Ziangmanti fangin cia thin rimsuhnak khiah hleng tuh rori i.

10 BAWIPA Pathian in:
“Babilon kumpibawi Nebukhadnezzar
kut in Izip mi runpui khiah bo ruai tuh ing.

11 Nebukhadnezzar le mi hmuahhmuah lakah
a riahsia ber a raalkapte khiah
Izip ram hnawm can tuh in kawi tuh i.
Amahte in Izip khiah vangsau thawn
tawng tuh ai Izip ram khiah a rek ai
thi hnak mite thawn dim tuh i.

12 A runti te khiah ro ruai tuh ing.
A ram khiah mi sualte hnenah zuar sah tuh ing.
Ram dang mite kut songin,
a ram le a songai umhnak hmuah
a vek in hnawmcan tuh ing.
BAWIPA kaimah in rel zo ing.

13 BAWIPA Pathian in:
“Amahte milim zuk khai hnawm sah tuh ing.
Noph ai milim zukte khai hnawm ruai tuh ing.
Izip ramah bawite khai um tuh nawn lo i.
Izip ramah lauhnak hleng ruai tuh ing.

14 Pathros khiah zaikhai bek lo in dah tuh ing.
Zoan khiah mai thawn tai tuh ing.
No khiah cawh tuh ing.

15 Izip rinsanhnak Sin vumah
i thinrawhnak khiah burh tuh ing.
No ai mi runpui khiah rek tuh ing.

16 Izip khiah mai thawn tai tuh ing.
Sin khiah ur rauh tuh i.
No khiah khoi tuh i.
Noph khiah nisiar in rimsu tuh i.

17 Aven le Pi Beseth ai tlangvalte khiah
vangsau thawn thi tuh i.
A khuate khai raalte in pom tuh sek i.

18 Izip haak khiah i ek sah ben fangin,
Tahpanhes khai khuathim tuh i.
A hngalhnak a tha khai pai tuh i.
Amah tu mairo in khuk tuh i.
A fenute khiah raalte in pom sah tuh i.

19 Ciatih in Izip khiah cawh tuh ing.
Ciafangin amahte in kaimah khiah
BAWIPA i, ti ling tuh i.”ti i.’ti in ti i.” ti in rel tu.

20 Kum hlaikhat kum, hla hmasaber ni sarih nia ah BAWIPA thu khiah i hnenah hleng i. 21BAWIPA in: “Mi fapa, Izip kumpibawi Pharaoh ban khiah ek sah ing. A ban khiah cak leh thai in bandage thawn khai pen lo i. Cen a kut thawn vangsau sin ben leh thai in a ban kho tuhin zai thawn khai pen lo i. 22Ciamanin BAWIPA Pathian in: “Izip kumpibawi Pharaoh lakah i raw i. A ban te khiah ek sah tuh ing. A ek sa le a ek lai lo ban khiah ek tuh ing. A kut songin vangsau khiah tlok ruai tuh ing. 23Izip mite khiah mi phun caang lak ah vai ruai tuh ing. Ram caang ah piak ruai tuh ing. 24Babilon kumpibawipa tha khiah hat ruai tuh ai a vangsau khiah a kut ah dah tuh ing. Ikhalselai Pharaoh ban khiah ek sah tuhai, ma tuar manin a thi banghma pa ai kap bangin amah khiah Babilon kumpibawi pa hmai ah kap tuh i. 25Ciatih bangin Babilon kumpibawipa tha khiah hat ruai tuh ai Pharoah tha khiah sung ruai tuh ing. Babilon kumpibawipa kut ah Izip ram tawng tuhin i vangsau khiah i dah fangin, amahte in kaimah khiah BAWIPA i, ti ling tuh i. 26Izip mite khiah mi phun hmuahhmuah lakah vai ruai tuh ai, ram caang ah piak ruai tuh ing. Ciafangin amahte in kaimah khiah BAWIPA i, ti ling tuh i.’ti i.”ti in i rel i.

<<  EZEKIEL 30  >>