1BAWIPA thu khiah i hnenah hetih bangin hleng i. 2BAWIPA in, “Mi fapa, Ammon mite hmun lamah hawi tulai, amahte ca ah prawfet thu rel tu. 3Ammon mite hnenah, ‘BAWIPA Pathian thu relhnak khiah ngai tuu-ih. BAWIPA Pathian in, “I temple khiah hnawmcan fangin le Israel ram khiah zaikhai bek lo in hnawm sio fangin le Judah mite khiah raalte in pom fangin, ningte in, ‘Aha!’ ti in ning ang manin, 4Nisuah hmunlam ai mite in ning ping ruai tuh ing. Amahte khiah ning lakah buk sa tuh ai ning lakah caam tuh i. Amahte in ning rong ning ei sah tuh ai ning cawhnawi ning ding sah tuh i. 5Rabbah khiah kala-uk inn ah can tuh ing. Ammon khiah tu le mete bualhmun ah haih tuh ing. Ciafangin ningte in kaimah khiah BAWIPA i, ti ling tuh i si.”ti i. 6Ziangmanti fangin BAWIPA Pathian in, “Israel ram khiah zohsuam in ning thin songin ning ang ai papabeng in ning ke thawn thuum manin, 7I kut khiah ning hmun lamah kawk ngangkhaw, ramdang mite in ning hnawmcan tuh in ning pe tuh ing. Ram dang mite lakin ning rek tuhai, ram hmuahhmuah songin ning rall ruai tuh ing. Hnawm ning can ngangkhaw ciafangin kaimah khiah BAWIPA i, ti ling tuh i si.”ti in ti i.
8BAWIPA Pathian in, “Moab le Seir in, ‘Sik tuu-ih. Judah mite khiah mi ram dang hmuah hmuah thawn bang pah i.’ti in rel manin, 9Moab ramri ai a hming thang khuate Beth Jeshimoth, Baal Meon le Kirjathaim te khiah 10Nisuah hmunlam ai mite in ping tuhin pe tuh in cia khuate khiah lar ruai tuh ing. Cen Ammon mite khai cia mite hnenah pe tuh ing. Ciafangin aisu in khai Ammon khiah hih tuh nawn lo i. 12Cen Moab khai cawh tuh ing. Ciafangin amahte in kaimah khiah BAWIPA i, ti in ling tuh i.
12BAWIPA Pathian in, “Edom mite in Israel mite khiah phuzul awng in sual manin, 13BAWIPA Pathian in, “I kut khiah Edom lamah kawk ngangkhaw, minung le ramsa khiah rek tuh sio ai Teman khiah zaikhai bek lo in um ruai tuh ing. Dedan khai vangsau in rek tuh i. 14Edom khiah i minung Judah mite kut in phuzul tuh ing. Judah mite in Edom ah i thinrawhnak bangin bawn tuh ai, ciafangin amahte in i phuzulhnak khiah ling tuh i.”ti in BAWIPA Pathian in rel i.
15BAWIPA Pathian in, “Filistin mite in riahsia ngai in phuzul ai amahte in Judah mite khiah a hlan ai panin hua manin hnawmcan tuhin phuzul manin, 16BAWIPA Pathian in, “I kut khiah Filistin mite hmun lamah kawk ngangkhaw, Cheret mite le tipui hmunlam ai umtu mite khiah rek tuh sio ing. 17Amahte khiah a rauh ngai in phuzul ngangkhaw ciafang in amahte in kaimah khiah BAWIPA i, ti ling tuh i.”ti in ti i.