Esther 5

<<  ESTHER 5  >>

1Ni thum nia fangin Esther khai a kumpibawi thilthuam khiah sil ai kumpibawi inn hmai ai kumpibawipa tualvan ah ding i. Ciafangin kumpibawipa khiah a inn songah a tauhkheng vumah a inn lut hmun dawngkham lam hoi in to i. 2Kumpibawipa in tualvan ah Kumpibawinu Esther ding hmu fangin, amah lakah lungkhim manin, a kut ai a sui faikiang khiah Esther hnen ah san i. Ciafangin Esther khai a nong ah kawi ai cia faikiang lu khiah dai i. 3Ciafangin kumpibawipa in amah hnenah, “Zai na daih i, Kumpibawi nu Esther? Zai i ngen na nuam i? I ukhnak a tlamhmat tian in na pe tuh ing!” ti in zawt i. 4Ciamanin Esther in, “Kumpibawipa lungkhim lekhaw, kumpibawipa le Haman khiah amah ca ai i bawt hnak puai ah kawi tuu-ih.” ti in sawn i. 5Ciafangin kumpibawipa in, “Esther ruaihnak bangin bawn tuhin a rang ngai in Haman khiah kawih tuu-ih.” ti in ruai i. Ciamanin kumpibawi pa le Haman khai Esther bawnhnak puai ah kawi i. 6Cia puai ah capittizu ding kong in kumpibawipa in Esther hnenah, “Na ngenhnak zai i? Na pe tuh ing. Zai na daih i? I kumpibawi ukhnak a tlamhmat tian maw? Na pe tuh ing!” ti in ti i. 7Ciafangin Esther in, “I ngenhnak le i daihhnak khiah he bang i. 8Kumpibawipa in kaimah lakah lungkhim lekhaw, cen kumpibawpa in i ngenhnak le i daihhnak khiah i pe tuhin lungkhim lekhaw, kumpibawipa le Haman khiah amahte ca ai i bawt sahhnak puai ah kawi tu seh. Ciafangin thangha ah kumpibawipa relhnak bang in bawn tuh ing.” ti in sawn i.

9Ciamanin Haman khai cia nia ah ang ngai in suak i. Ikhalselai Haman in Mordekai khiah kumpibawipa kawl dawngkham ah hmu ai Mordekai in ding khai ding lo, amah lakah lau khai lo hmu fangin, Haman khai Mordekai lakah thinraw rauh i. 10Ikhalselai Haman khai a thinsup ai inn ah tlung le a rualpuite le a nu Zeresh khiah ko i. 11Ciafangin Haman in amahte khiah a lianhnak le a fate tamngai naihnak thu le kumpibawi in amah khiah do ai tunin kumpibawi tlangsuakte le a hnenumte hnak in upa sawn ai dahhnak thute khiah rel i. 12Ciazolo ah Haman in, “Ciahlai ah, Kumpibawinu Esther in amah bawnhnak puai ah kumpibawipa thawn kawi tuh in kaimah lo aisu khai ko lo i. Cen thangha ah amah in kumpibawi pa thawn i ko leh thio i. 13Ikhalselai Judah mi Modekai khiah kumpibawi pa kawl dawngkham ah to i hmu song hmuah in, hete khiah zaikhai i hnempui lo i.” ti in ti i. 14Ciafangin a nu Zeresh le a rualpuite in, “Dong sawmnga saang minung taar hmun tuh khuam bawn tulai, thangha ah Mordekai khiah ciata ah tar tuhin kumpibawipa sawm tu. Ciaben fangin thintlong ngai in kumpibawipa thawn puai ah kawi tu.” ti in so i. Haman khai lungkhim ai khuam khiah bawn i.

 <<  ESTHER 5  >>