1Cia thu khiah Mordekai in ling fangin, ani khai a thuam khiah zik ai vaidip le vutkuang khiah sil ai khua laiteng ah kawi i. Ciata ah aw cawm ngai le lungsia ngai in kap i. 2Ani khai kumpibawipa kawl dawngkham tian lek kawi i. Ziangmanti fangin vaidip sil kongin aisu khai kumpibawipa kawl dawngkham song ah lut dan lo i. 3Cen kumpibawipa thusuahhnak hleng hmun ram caang ah, Judah mite khai rongul in lungsia ngai in kap tlang ai mi tampui khai vaidip le vutkuang sil in taal tlang i.
4Ciamanin Esther hnenum nupangte le tilretsa pasal hnenumte khai a hnenah kawi ai rel fangin, kumpibawinu khai a thintawp ngai in um i. Ciafangin Mordekai sil tuhin thuam le a silhnak vaidip khiah lang sah tuhin a hnenumte khiah hlat i. Ikhalselai Mordekai in sil nuam lo i. 5Ciafangin Esther in kumpibawipa in Esther hnenum tuh ai dahhnak tilretsa pasal Hathak tihnak pa khiah Mordekai in zaimanin hetih bang in bawn khiah zong tuhi feh ruai i. 6Ciamanin Hathak khai kumpibawipa kawl dawngkham hmai ai tualvanah Mordekai hnenah kawi i. 7Ciafangin Mordekai in a vumah canghnak thu hmuahhmuah le Judah mite rek tuhin Haman in kumpibawi tangka khawlhmun ah zaizah tangka dah tuh ai khamhnak thute khiah rel i. 8Cen amahte rekhnak tuhai Shushan khua ah suahhnak lai khai Esther hmuh tuhin le rel tuh in pe i. Cen Esther in kumpibawipa hnenah kawi in a minungte ca in ninghio ngen sah tuhin khai ruai i. 9Ciamanin Hathak khai Esther hnenah let leh ai Mordekai ai relhnak thu khiah rel i.
10Ciafangin Esther in Mordekai khiah hetih bang in rel tuhin Hathak khiah hlat i: 11“Pasal nupui aisu khai i tu seh kumpibawipa zung songah lut fangin kumpibawipa in a sui faikiang khiah cia pa hnenah san hlahlekhaw, cia pa khiah rek tuh lio i, tihnak dan upadi khiah kumpibawipa hnenumte in le kumpibawipa ram song ai umtu mi hmuah in ling i. Ikhalselai tunin kaimah khai ni sawmthum song kumpibawipa hnenah kawi tuhin i ko lai lo i.” ti in rel ruai i. 12Ciamanin amahte in Mordekai khiah Esther relhnak thu khiah rel i.
13Ciafangin Mordekai in amahte khiah Esther hnenah, “Kumpibawi inn songah um manin a dang Judah mite hnak in na luat tuhin na thin songin lo ruat mah. 14Ziangmanti fangin tunin zai khai pong lo in dapthen in um ngio lesikhaw, Judah mi luat ruaitu tuhin hmun dang in suak tuhai, nangmah le na paate innkua khiah rall tuh sio i. Ikhalselai he bang ca ai kumpibawi ukhnak ram songah na suak ruai le ruai lo khiah aisu in ling thill i?” ti in sawn ruai i. 15Ciafangin Esther in amahte khiah Mordekai hnenah: 16“Feh tulai, Shushan ai Judah mite a veksen in kaimah ca in ni thum song sun le zan rongul in ziang khai ding le ei lo in um ruai tu. Cen kai khai i hnenum nupangte kawmin rongul tuh ve ing. Ciafangin dan upadi bangin inapui hlahkhaw, kumpibawipa hnenah kawi ngang. I thi lekhaw i thi tu seh.” ti in rel ruai i. 17Ciafangin Mordekai khai feh ai Esther ruaihnak bangin a veksen in bawn i.