1Ciahnua ah, Kumpibawipa Ahasuras khai a thinraw lawm fangin, Vashti ai bawnhnak le Vashti vumah sungphiat hnak khiah hih i. 2Ciafangin kumpibawipa hnenumte in amah hnen ah, “Kumpibawipa ca in fenu khiah sii nga sing. 3Kumpibawipa in a ukhnak ram songai fenu mawi hmuahhmuah Shushan khuapui ah kawih tuhin mi upate dah tu selai cia fenute khiah nupang umhmun inn ah dah in nupangte kilkhawtu a til retsa Hekai kuthnia ah dah tu seh. Ciafangin cia fenute khiah mawi ruai tuhin par tu seh. 4Ciafangin kumpibawipa lungkhim ruaitu fenu khiah Vashti ca in kumpibawinu cang tuh seh.” ti in ti i. Cia khiah kumpibawipa in lungkhim ai ciatih bangin bawn i.
5Ciafangin Shushan khuapui songah Benjamin mi Kish fapa Shimei fapa Jair fapa Mordekai tihnak Judah minung pakhat lo um i. 6Kish khiah Babilon kumpibawipa Nebukhadnezzar in Judah kumpibawipa Jekhoniah le a minungte khiah pom ai Jerusalem in Babilon ah phurhnak mite lakah lo tel ve i. 7Ciale Mordekai in a pu fenu Esther tihnak Hadassah in nuu le paa nai lo manin, Mordekai in lo cawm i. Cia fenu niu khiah a mawi ngai i. A paa le a nuu thi fangin, Mordekai in a fenu bangin cawm i.
8Ciamanin kumpibawipa thu suahhnak le upadi khiah za fangin, Hekai in kilkhawl tuhin Shushan khuapui ah fenute khiah khawm ai nupangte kilkhawltu Hekai in kilkhawl tuhin kumpibawipa inn ah Esther khai kawih ve i. 9Cia fenu niu in amah khiah thinkhim ruai manin a zartohnak ngah i. Ciamanin cia fenu khiah a mawi ruai tuhin thilrite le rongte khiah pe zual i. Cen kumpibawi pa inn songai hnenum nupang a phaber pasarih khai pe ai cia hnenum pasarihte kawmin nupangte inn ai a phaber khaan khiah pe i. 10Mordekai in rel tuh lo in kham manin, Esther in a minungte le a phun khiah aisu khai rel lo i. 11Nisiar in Mordekai khai Esther thu ling nuam in nupangte inn tualvan hmai in vak hnelhno de i.
12Cia fenute khai hla hlainih song nupangte par dan bangin par ben fangin, pakhat hnua pakhat Kumpibawipa Ahasuras hnenah kawi de i. A par dan khiah he bang i: hla ruk song thau le myrrh pawh ai, hla ruk song zihmui thawn nawih ai mawi ruai i. 13Ciatih in amahte khiah par ben fangin, cia fenute khiah nupang inn songai amahte daihhnak hnak thilri thawn kumpibawipa inn songah kumpibawipa hnenah kawi de i. 14Cia fenute khiah zanlam fangin kawi ai zinglam fang in a panihhnak nupang inn ah tlung leh de ai, kumpibawi nunawn kilkhawl tu a tilret sa Shaashkaz in kilkhawl de i. Cen kumpibawipa in cia fenu lakah thinkhim manin a hming in ko leh hlahlekhaw, cia fenu khiah kumpibawipa hnenah kawi leh lo i.
15A puu in a fenu bangin cawmhnak Abihail fenu Esther khiah kumpibawipa hnenah feh tuh can khim fangin, kumpibawipa hnenum Hekai ai tiamhnak lo zai khai zawt lo i. Esther hmu tu hmuahhmuah in amah khiah daih tlang i. 16Ciamanin Esther khai Kumpibawipa Ahasuras hnenah, kumpibawipa ukhnak kum sarih kum Tebeth hla, hla ha hla ni ha nia ah kumpibawipa inn ah kawih i. 17Kumpibawipa khai Esther lakah a dang nupuite hnak in lungkhim sawn ai, a dang fenute hnak in daih sawn i. Ciamanin Esther lu ah kumpibawi lukhuk khiah khu ai Vashti ca in kumpibawinu cang ruai i. 18Ciafangin kumpibawi pa in Esther Puai ti in puai lian ngai khiah a tlangsuakte le a hnenumte ca in bawt i. .A ram songai zungte khai pit ruai ai kumpibawi bangin a siang ngai in lehsawng khai pe i.
19Fenute khai a vel nihhnak tai leh thio fangin, Mordekai khai kumpibawipa kawl dawngkham ah to i. 20Cen Mordekai in tiam bangin, Esther in a minung le a phun khiah aisu khai rel lo i. Ziangmanti fangin, Esther in Mordekai thu khiah a inn ah a um lai bangin, ngai i.
21Ciateng in Mordekai khai kumpibawipa kawl dawngkham songah to teng fangin, kumpibawi pa hnenum a til ret sa panih dawngkham kiltute Bikthan le Teresh khiah thinraw rauh manin Kumpibawipa Ahasuras rek tum i. 22Cia thu khiah Mordekai in ling fangin Kumpibawinu Esther khiah rel ai Esther in kumpibawipa khiah Mordekai hming in rel i. 23Cia thu khiah zong fangin, a hman i ti khiah ling ai cia mite panih khiah ri thawn thing vumah tar i. Cia thu khiah kumpibawipa mithmuh in thuanthu khumhnak ca-uk songah khum i.