1Ciafangin Moses khai feh ai Israel te hnenah he thu khiah rel i. 2Moses in, “Tunnia ah kum za le kul i khim i hang. A suak khai ben lo i hang ing. A lut khai ben lo i hang ing. Cen Bawipa in khai ‘He Jordan khiah tan tuh lo i si.’ ti in i rel zo i. 3Bawipa ning Pathian khiah ning hmai in tan tuh i. Ning hmai in he mite khiah hnawmcan tuhai ningte in hnawt tuh sio i si. Bawipa ai relcia bangin Joshua in ning hlanin tan tuh i. 4Bawipa in Amor te kumpibawi Sihon le Ok le a ram te khiah hnawmcan bangin amahte vumah khai bawn tuh i. 5Kaimah ai ning ruaihnak thukham bangin amahte vumah ning bawn tuhin Bawipa in amahte khiah ning hnenah ning ap tuh i. 6Thahat in raalpha tuu-ih. Lau mah ih. Amahte khiah kih khai kih mah ih. Ziangmanti fangin ning Bawipa ning Pathian in ning fehpui i. Amah in ning hlum tuh lo i; cen zam khai ning zam tuh lo i.” ti in rel i.
7Ciafangin Moses in Joshua khiah Israel mite veksen hmai ah, “Thahat in raalpha tu. Ziangmanti fangin he mite kawmin Bawipa in a paate hnenah pe tuhin khamhnak ramah fehpui tuhai amahte in cia ram khiah roco ruai tuh i si. 8Bawipa khiah ning hmai in feh tuh i. Amah khiah ningmah thawn um tuhai, ning hlum khai ning hlum tuh lo i; cen zam khai ning zam tuh lo i. Ciamanin lau khai lau mah; thinhnawm in khai um mah.”ti in rel i.
9Ciamanin Moses in he dan upadi khiah ngan ai Bawipa thawn lungkhim dunhnak thukham khawi hmun thingkuang phur tu Levi fapate phungkite le Israel upate veksen hnenah pe i. 10Ciafangin Moses in amahte khiah, “Kum sarih bo ai hlathnak kum Tabernacle Puai fangin 11Israel mi veksen khiah Bawipa ai ril hmunah Bawipa ning Pathian hmai ah kawi fangin Israel mi veksenin za thai he dan upadi khiah siar tuh i si. 12Amahte in za in Bawipa ning Pathian khiah kih in he dan upadi thu khiah ralring ngai in hlun thai in pasal, nupui le naupangte le ning kawl dawng ai mikhualte khiah hmunkhat in tai ruai tu. 13 Ciafangin a ling awng lo tu a fate in khai za in Jordan khiah tanin ning ping tuhhnak ramah ning nung song hmuah in Bawipa ning Pathian khiah kih tuh i.”ti in rel i.
14Ciafangin Bawipa in Moses hnenah, “Na thi nia cuu khiah khim i hang. Joshua ko tulai tawkdunhmun tabernacle songah lut tulai Joshua khiah tavuan pe tuh ing.”ti in rel i. Ciamanin Moses le Joshua khai tawkdunhmun tabernacle songah lut kawm i. 15Ciafangin Bawipa khai tabernacle songah mairo pui songin hleng ai mairo pui khai tabernacle dawngkham vumah ding i.
16Ciafangin Bawipa in Moses hnenah, “Na paate hnenah na thi tuh i. Ciafangin he minungte in amahte umhmun ram dang mite pathiante thawn phatemah bawn tuh i. Kaimah khiah i zam tuhai amahte thawn lungkhim dunhnak kin thukham khiah pilh ruai tuh i. 17Ciafangin cia nia ah kai khai amahte lakah thin i raw tuhai, amahte khiah zam tuh ve ing. Amahte hmunin i hmai khiah thup tuhai ciafangin amahte khiah mite in ei tuh sio i. Ciafangin amahte vumah a pha lo le rimsuhnak khiah hleng tuhai ciamanin amate in cia nia ah, ‘He a pha lo kin vumah hlenghnak khiah kin lakah Bawipa um nawn lo manin i vuah bang?’ti in ti tuh i. 18Amahte in a dang pathiante khiah hlun in a pha lo khiah bawn manin cia nia ah i hmai khiah thup tuh lio ing. 19Ciamanin he la khiah khum tulai Israel mite khiah cuk tu. He la khiah Israel mite lakah i tettikhanhnak cang tuhin amah kaa songah dah tu. 20A paate hnenah i khamhnak cawhnawi le khoitilu luang hmun ramah amahte khiah i kawih fangin amahte khiah rongkham in thau hiar fang in a dang pathiante khiah hlun tuhai amahte na per sah tuh i. Ciafangin thin i tok ruai tuhai i lungkhim dunhnak thukham khiah pilh ruai tuh i. 21A pha lo le rimsuhnak khiah amahte vumah hleng fangin he la in amahte lakah tettikhan tuh i. Ziangmanti fangin a tesin fate kaa songin hai thill tuh lo i. Ziangmanti fangin amahte hnenah i khamhnak ramah i kawih hlan rinin amahte nuncan ziaza khiah ling zo ing.” ti in rel i.
22Ciamanin Moses in he la khiah cia nia ah ngan ai Israel mite khiah cuk i. 23Ciafangin Bawipa in Nun fapa Joshua khiah tavuan pe ai, “Thahat le raalpha in um tu. Ziangmanti fangin amahte hnenah i khamhnak ramah Israel mite khiah kawih tuh i si. Cen kaimah khai nangmah thawn um tuh ing.” ti in rel i.
24Moses in dan upadi thute khiah ca-uk songah khum ben fangin 25Moses in Bawipa lungkhim hnak thukham thingkuang phurtu Levi te hnen ah, 26“He Dan Upadi Ca-uk khiah lang in Pathian lungkhim dunhnak thingkuang songah khawi tu i lai ciata ah ning lakah tettikhanhnak i tu seh. 27Ziangmanti fangin mi tawng thai le mi ungtuang khiah ning ling ing. Tunnia i nung lai rin in Bawipa khiah tawng leisikhaw, i thi hnua fangin zaizah tamin tawng tuh i si? 28Ning phun lakai mi upate le ning bawite khiah i hnenah khawm ruai tu i lai he thute khiah amahte in za thai in rel ngang. Ciafangin van le laipua khiah amahte lakah tettikhan ruai tuh ing. 29Ziangmanti fangin i thi hnua fangin ning sual rauh tuhai i ruaihnak bangin hlun tuh bul lo i si. Ning kut ai perhnak naper in Bawipa khiah thinraw tuhin thintok ruai ai amah hmai ah a pha lo ning bawn manin tunhnua ah ning vumah a pha lo hleng tuhn i.” ti in rel i.