Deuteronomy 30

<<  DEUTERONOMY  30  >>

1Ning hmai ai i dahhnak hmuifu le  awrsia khiah ning vumah hleng fangin, Bawipa ning Pathian in ning hnawt hmun mi phun lakah ning umin fangin hete khiah hih leh in, 2ning Bawipa ning Pathian hnenah let leh in tunnia kaimah ai ning relhnak bangin a aw khiah ning thinlung veksen le ning rauhla veksen thawn ning fate kawmin ngai leisikhaw, 3Bawipa ning Pathian in ning thawngtla hmun in ning suah leh tuhai, ning ninghio tuhai Bawipa ning Pathian in ning peu ruai hmun mi phun cang lakin ning khawm leh tuh i. 4Cen vanhang hnia a hla ber ah ning hnawt lekhaw, ciata in Bawipa ning Pathian in ning khawm leh tuhai ciata in ning lang leh tuh i. 5Ciafangin Bawipa ning Pathian in ning paate ai ping awnghnak ramah ning kawih tuhai cia ram khiah ping tuh i si. Ning paate hnak in ning pung ruai in ning zaai ruai tuh i. 6Ciafangin Bawipa ning Pathian in ningmah le ning tesin fate thinlung khiah vunpar ning cem sah tuhai ning nung thai in Bawipa ning Pathian khiah ning thinlung veksen le ning rauhla veksen thawn it tuh i si. 7Cen Bawipa ning Pathian in he awrsiate khiah a veksenin ning hua tu le ning rektute vumah dah tuh i. 8Ciafangin Bawipa aw khiah ngai leh tuhai tunnia ai ning ruaihnak bangin a thukham khiah a veksenin hlun tuh i si. 9Bawipa ning Pathian in ning kut ai perhnak hmuah le ning songai ning fate le ning suumhnamte le ning ramai pohnak khiah pung ruai tuhai pha ruai tuh i. Ziangmanti fangin Bawipa khiah ning paate vumah ang bangin ning vumah khai ang leh tuhai ning pha leh tuh i. 10Ciamanin Bawipa ning Pathian aw khiah ngai tuu-ih. He Dan Upadi Ca-uk songai nganhnak a thukhamte  le a upadi te khiah hlun tuu-ih. Cen ning thinlung veksen le ning rauhla veksen thawn Bawipa ning Pathian hnenah let leh tuu-ih.

11Ziangmanti fangin tunnia ai kaimah ai ning pehnak thukham khiah a ling khai har lo i; cen a hla ngai ah khai i lo i. 12Vancung ah khai i lo i. Ciamanin, ‘Kin in za in hlun tuhin aisu in vancung in kin kawih sah tuh i?’ ti mah ih. 13Cen tipui kaan ah khai i lo i.  Ciamanin , ‘Aisu in tipui vumah kin ca in kawi in, kin te in za in hlun tuhin kin kawih sah tuh i?ti in khai ti mah ih. 14Ikhalselai cia thu khiah ning nong niu ning ka song le ning thin songah um i. Ciamanin hlun tuu-ih.

15Sik tuu-ih! Ning hmai ah nunhnak le a pha le thihhnak le a pha lo khiah ning dah sah zo ing. 16Ciamanin ning nung thai tuhin le ning zaai thai tuhin Bawipa ning Pathian khiah it in a lampui ah vak in, a thukhamte le a dan upadite le a thukhanhnak bangin hlun tuhin tunnia ah ning ruai ing. Ciale Bawipa ning Pathian in ning ping tuhai ning feh hmun ramah hmuifu ning bur tuh i. 17Ikhalselai ning thinlung khiah her teu man in za lo in a dang pathiante hnenah nongin amahte khiah bia in amahte na per per sah leisikhaw, 18Tunnia ah ning rel ing, ning rall tuh tengteng i. Jordan run khiah tanin ping tuhin ning feh hmun ramah ning nun ning sau tuh lo i. 19Van le lai khiah i tetti khantu tuhin ko zo ing. Ning hmai ah nunhnak le thihhnak, hmuifu le awrsia ning dah sah ing. Ciamanin ningmah le ning tesin fate kawmin ning nung thai in nunhnak sawn ril tuu-ih. 20Bawipa ning Pathian khiah it tuu-ih. A aw khiah ngai tuu-ih. Amah hnenah bet in leep tu meng ih. Ziangmanti fangin amah khiah ning nunhnak le ning nun sau ruai tu i. Ciafangin Bawipa in ning paate Abraham le Aizek le Zakuk te hnenah pe tuhin khamhnak ramah um tuh i si.” ti in rel i.

<<  DEUTERONOMY  30  >>