Deuteronomy 29

<<  DEUTERONOMY  29  >>

1Hete khiah Moses in Israel mite thawnin Moab ramah bawn tuh ai Bawipa in ruaihnak Pathian le minungte lungkhim dunhnak (covenant) thu te i. Cia khiah Horeb ah Bawipa in Israel mite thawn thukham dunhnak ai zolo ah thukhanhnak thute i. 2Moses in Israel mite khiah a veksen in ko ai, “Bawipa in ning mit hmuh in Izip ramah Pharoah le a hnenumte le a ram veksen songah bawnhnak 3ngaihsunurkul le hnikhnaihhnak lian ngaingai le urhnakte khiah ning mit in hmu zo i si. 4Ikhalselai tunnia tian in Bawipa in linghnak thinlung le khuahmuhnak tuh mit le khuazahnak tuh bil khiah ning pe lai lo i. 5Cen kum sawmli song nelrawn songah ning fehpui zo ing. Ning thilthuam khai her veng lo i. Cen ning ke ai ning kedawl khai  her  veng lo i. 6Kaimah khiah Bawipa ning Pathian i ti ai ning ling thillhnak tuhin pawnghmuk khai ei lo i si. Cen capittizu le a dang zu khai ding lo i si. 7He hmunah ning hleng fangin Heshbon kumpibawi  Sihon le Bashan kumpibawi Ok in kin tawng tuhin kin sim fangin amahte khiah neh berh i  sing. 8Amahte ram khiah long sah ai Reuben le Kad le Manasseh phun hrekkhate in roco tuhin pe i  sing. 9Ciamanin ning bawnhnak cang ah a veksenin khim thill thai in he lungkhim dunhnak thukham khiah ngai in hlun tuu-ih.

10Ning uktute le ning phunte le ning upate le ning bawite le Israel pasal veksen le 11ning fate le ning nu te le thing ning fom sah tu le ti ning cawi sah tu ning camp songai mikhualte kawmin 12Bawipa ning Pathian thawn lungkhim dunhnak thukham tuhin le tunnia ah ningte thawn Bawipa ning Pathian in  13ningte khiah amah minung in ning bawn tuhai ning paa te Abraham, Aizek le Zakuk hnenah tiam bangin le ning hnenah ning rel bangin ning Pathian cang tuhin thu ning khamhnak co tuhin tunnia ah Bawipa ning Pathian hmai ah ding i si.

14He lungkhim dunhnak thukham le thukam dunhnak khiah ningte thawn ian in bawn lo ing. 15Ikhalselai tunnia heta ah Bawipa ning Pathian hmai ah kinte thawn ding tu te le kin thawn  heta ah tunnia ah um lo tute thawn khai bawn ing. 16(Ziangmanti fangin Izip ramah um awng khiah hih hlen i si. Mi phun tamngai khiah khel in feh ai 17amahte ningdulkulhnak le thing le lungto le sui le ngun thawn bawnhnak amahte milim khiah hmu i sing.) 18 Ciamanin ning lakah pasal, nupui le innkua le hin te in Bawipa kin Pathian hnenin a thin khiah tunnia ah her in he mite pathiante naper sah tuh lo in ralring tuu-ih. Cen ning lakah cia bang thih si suak ruai thai hnuk nai tuh lo in ralring tuu-ih. 19Cialo fangin amah in he awrsia camhnak thu khiah za fangin amah veve khiah a thin songin, ‘I  nuam bangin nung khal ingkhaw i him tuh hlen i.’ ti in ruat pang thai i. Ciafangin ti burhhnak lai beh le lai ro vumah hnophnak suak tuh i. 20Bawipa in cia pa khiah zah tuh lo i. Ziangmanti fangin Bawipa thinraw hnak le A iksikhnak khiah cia pa vumah hleng tuhai cia pa vumah he ca-uk songai nganhnak awrsia hmuah khiah tlok tuh i. Cen Bawipa in a hming khiah vanhang hnia in phiat sah tuh lio i. 21He Upadi Dan Ca-uk songai nganhnak lungkhim dunhnak thukham songai awrsia camhnak bangin Bawipa in amah khiah Israel minung songin hnawmcan tuhin ril tuh i. 22Ning hnua ai suaktu ning tesin fate le ram hla ngai ai hleng tu ram dang mite in Bawipa ai he ramah kawihhnak urhnak le harsahnak khiah hmu tuh i. 23Cia ram khiah katmei le ci le mei ai kang hnak  ram cang tuh i. Cia ramah ci khai cing tuh lo. Zai khai po tuh lo ai hampa bang rin po tuh lo i. Bawipa in Sodom le Kawmawrah le Admah le Zeboim khiah a thinraw ze in hnawmcan bang in he ram khai hnawmcan tuh i. 24Ciafangin mi phun hmuahhmuah in, ‘Ziangmanin Bawipa in he ram khiah hetih bang in bawn i? Zaimanin hetih bangin a thinraw i?’ti in zawt tuh i. 25Ciafangin mite in, ‘Amahte in  a paa te Bawipa Pathian ai amahte thawn Izip ramin a suah fangin lungkhim dunhnak thukham khiah hlun awl ai, 26amahte ling awng lohnak le Bawipa ai pe awng lohnak   pathiante khiah bia ai a na per sah manin 27Bawipa khiah he ram lakah thinraw ai he ca-uk songai nganhnak awrsia hmuah hleng ruai i. 28Bawipa khiah amahte lakah thinraw ze manin amahte khiah he ramin phai berh ai tunnia tianin ram dangah lon berh i.’ ti in ti tuh i. 29Thuthupte khiah Bawipa kin Pathian lek in ling i. Ikhalselai he dan upadi songai thu khiah a veksenin kin hlun thaihnak tuhin kin ling ruaihnak thute khiah kinmah le kin fate ca i.

<<  DEUTERONOMY  29  >>