1Cen ningte in Bawipa ning Pathian aw khiah a kungniu in ngai in, tunnia ai kaimah ai ning ruaihnak a thukham hmuahhmuah khiah a veksenin a kungniu in hlun leisikhaw, Bawipa ning Pathian in laivumai mi phun veksen hnakin saang sawn tuhin ning bawn tuh i. 2Ningmah in Bawipa ning Pathian aw khiah ning ngai manin he hmuifu a veksenin in ning vumah hleng tuhai ning kaan in hleng tuh i. 3Khua song ah hmui ning fu tuh i. Hampalakah hmui ning fu tuh i. 4Ning songai ning fate le ning laipua songai pohnak le ning suumte le ning kawlpawte le ning tuu le me te fate khiah hmuifu tuh i. 5Ning rong bawm le ning rong rawih hmun belte khiah hmuifu tuh i. 6Ning lut fangin hmui ning fu tuh i. Ning suak fangin hmui ning fu tuh i. 7Ning tawng tuhai tho tu ning raalte khiah Bawipa in ning hmai in ning neh ruai tuh i. Amahte khiah hmunkhat in ning sim tuhai hmun sarih in tlan tuh i. 8Bawipa in ning rong ben le ning kut ai perhnak hmuah hmuifu bur tuhai, Bawipa ning Pathian pehnak ramah hmuifu ning bur tuh i. 9Bawipa ning Pathian thukham khiah hlunin a lampui ah vak leisikhaw, amah in thu ning kham bangin Bawipa in amah hnenah mi cianghlim ning cang ruai tuh i. 10Ciafangin laivum mi hmuah in ningte khiah Bawipa minungte ti in ning hmu tuhai ning kih tuh i. 11Ning song ai ning fate le, ning suumhnamte le ning laipua songai pohnak te le Bawipa in ning pe tuhin ning paa te hnenah khamhnak ramah, Bawipa in a putung in ning pe tuh i. 12Bawipa in vancung dawng khiah ning hon tuhai a hlawnthil pha pha khiah ning pe tuh ai a cu bangin ning ramah ruah sii ruai tuhai ning kut ai perhnak hmuah ah hmuifu ning bur tuh i. Mi phun tamngai khiah ningte in thilri zawn tuh ai ikhalselai ningte in pu tuh lo i si. 13Bawipa in mite lu ah ning bawn tuhai a mite mei ning cang tuh lo i. Tunnia ai i ruaihnak Bawipa ning Pathian thukham khiah a zizu in a kungniu in hlun leisikhaw mite vumah lek um tuh ai mi hnia ah um tuh lo i si. 14Ciamanin tunnia ai kaimah ai ning ruaihnak i thu songin kiahhan lam le kekeh lamah tler mah ih. Cen a dang pathiante khai a na per sah mah ih.
15Ikhalselai Bawipa ning Pathian aw khiah ngai lo in tunnia ai kaimah in ning ruaihnak a thukham veksen khiah a kungniu in hlun hlah leisikhaw, he awrsiate khiah ning vumah hleng tuhai ning kaan in hleng tuh i. 16Khua songah awrsia camhnak ngah tuh i si. Hampalakah awrsia camhnak ngah tuh i si. 17Ning rong bawmte le ning rong rawih hmun belte khiah awrsia camhnak ngah tuh i si. 18Ning songai ning fate le ning laipua ai pohnak te le ning kawlpawte le ning tuu le me te fate khiah awrsia camhnak ngah tuh i. 19Ning lut fangin awrsia camhnak ngah tuh i si. Ning suak fangin awrsia camhnak ngah tuh i si.
20Ningmah in sualhnak khiah bawn ai Bawipa khiah zam manin, ning hnawm berh le ning pai berh hlan lo Bawipa in ning cam tuhai ning taw ruai tuh i. Ning kut ai ning bawn tumhnak lakah ning hau tuh i. 21Ping tuhai ning feh hmun ramin ning thi ruai hlanlo urhnak khiah Bawipa in ning vumah bek ruai tuh i. 22Bawipa in urhnak thawn ning ur ruai tuh i. Fawi thawn ning hlawng ruai tuh i. Vangsau le ni sa le naidawh thawn ning rek tuh i. Ning thi hlan lo ning hnawh tuh i. 23Ning vumai ning van khiah dar bang cang tuhai ning hnia ai laipua khai thir bang cang tuh i. 24Bawipa in ruah khiah laivut ah cang ruai tuh i. Ning hnawmsio hlan lo van vumin ning vumah tlok tuh i. 25Bawipa in ning raalte in ning neh ruai tuh i. Amahte tawng tuhin hmunkhat in feh tuh ai hmun sarih in tlan tuh i si. Laivumai kumpibawi ram hmuahhmuah ah mi hnaihnoktu ning cang tuh i. 26Ning vuitum khiah hli lakai vaniu le hampalakai ramsate rong cang tuhai aisu in khai ning hung sah tuh lo i. 27Bawipa in Izip ramai urhnak uihlut le hmaihma bol taingen le thakthak thawn ning ur ruai tuh ai ning cak thill tuh lo i. 28Bawipa in ning am ruai tuhai mit ning caw ruai tuh i. Thin am in khai ning um ruai tuh i. 29Mitcaw pa in khuathim lakah phat bang in sunlai ai a phat kong in vak tuh i si. Nun ning nuam tuh lo i. A catlo in mi in ning nemh tuh ai ning rok tuh tio ai aisu in khai ning o tuh lo i. 30Nu pakhat thawlthan tuh ai mi dang pakhat in na itpui sah tuh i. Inn sa tuhai hluh man tuh lo i si. Capit vuandum bir tuhai capit thai loih ngah tuh lo i si. 31Ning mit hmai ah ning kawlpaw cang khiah rek tuhai a sa ei ngah tuh lo i si. Ning lak khiah a khengkhebel in ning lang sah tuh ai ning khirh leh tuh lo i. Ning tuute khiah ning raalte hnenah ning pe sah tuh ai aisu in khai ning o sah tuh lo i. 32Ning fapa le ning fenute khiah mi dangte hnenah pe tuhai sunnivui ning mit thawn a ngaai kongin sik tuh i si. Ning kut khai tha um tuh lo i. 33Ning ling awng lo mi phun te in ning ramai rong le ning kut ai perhnak rong khiah ning ei sah tuh i. Ningte khiah a zomzet in ning nemh tuhai ning seu tuh i. 34Ning mit ai hmuhnak manin thin ning raw rauh tuh i. 35Bawipa in ning ke hnia ai panin ning lu le ning khuk le ning ke vumah hmaihma bol thawn ning ur ruai tuh ai ning cak thill tuh lo i. 36Bawipa in ning uktu kumpibawi kawmin ning paate ai ling awng lohnak mi phun hnenah ning kawih tuhai ciata ah thing le lungto pathiante khiah na per sah tuh i si. 37Ciafangin ningte khiah Bawipa ai ning kawih hmun caangah mi ngaihsunurhnak, mi santeh hnak le mi hnihsanhnak mi ning cang tuh i. 38Lo ah rongcii a tamngai keng tuhai a tlawmniu lek khawm ngah tuh i si. Ziangmanti fangin khokhuakte in ei tuh sek i. 39Capit vuandum bir tuh napui ai capitti khai ding ngah tuh lo i si. A thai khai loih ngah tuh lo i si. Ziangmanti fangin pangang in ei tuh sek i. 40Ning ram pumpalah ah oliv thing nai tuh napui ai ningmah veve khiah a thau noih tuh lo i si. Ziangmanti fangin ning oliv thai khiah tlok tuh sio i. 41Fapa le fenu cawi tuh napui ai ningte in ping tuh lo i si. Ziangmanti fangin ramdang ah thawngtla tuh i. 42Khokhuak in ning thing le ning ramai pohnak hmuah ei tuh sio i. 43Ning lakai mi ram dang mi khiah saang tuh am am ai ning te khiah ning niam tuh am am i. 44Amah in thilri ning zawn tuhai ning in zawn thun tuh lo i si. Amah khiah ning lu cang tuhai ningte khiah a mei cang tuh i si. 45Bawipa ning Pathian ai ning ruaihnak a thukham le a upadite khiah hlun lo manin ning hnawmcan sek hlan lo he awrsia camhnak in ning hnawh tuhai ning man tuhai ning khuk tuh i. 46Amahte khiah ning vumah le ning tesin fate vumah kumzangza ngaihsunurkul le hnikhnaihhnak tuhin hleng tuh i.
47Thil hmuahhmuah a tamngai ai nai napui ai Bawipa ning Pathian khiah thinlung anghnak thawnin a na per sah lo manin, 48Bawipa in ning hnenah hlat tuhhnak ning raalte khiah rikam le tihaal le kawngkolh in le zai hmuahhmuah sam kongin a naper sah tuh i si. Ning thi sek hlan lo Bawipa in ning hawng ah thir hak ning phurh tuh i. 49Bawipa in laivum a hla ngai ramin a pon khai ning ling awng lohnak le mu zuang bangin a cak ngai le 50mithmai thim bik, patar khiah zul lo cen naupang khai daw lo mi phun khiah ning tawng tuhin kawih tuh i. 51Ciafangin amahte in ning suumhnam le ning ram ai pohnak khiah ning thi sio hlan lo ning ei sah tuh i. Amahte in ning rek sio hlan lo rong mu le capittizu thar le thau le ning kawlpawte le ning tuu le mete fate khiah ning hlup tuh lo i. 52Ning rinsanhnak ning khuarenhnak a sang ngai ning sente khiah ning ram pumpalah ah ning bal sah hlanlo ning kawl dawng ah ning kulh tuh sio i. Bawipa ning Pathian ai ning pehnak ramai ning kawl dawng ah ning kulh tuh sio i. 53Ciatih ai ning kulh fangin ning raalte in ning rim rauh fangin ning songai suakhnak ningmah fapa le fenu te sa khiah ei tuh i si. 54Ciafangin ning lakai mi nunpha rauh pa rinin a unau le a huamhnak a nu le a hnua ai a hlumhnak a fate hnenah thin com niu in um tuh i. 55Amah ai ei tuumhnak a fate sa khiah aisu khai pe nuam tuh lo i. Ziangmanti fangin ning kawl dawng ah ning raalte in ning rim rauh ai ning kulh manin ziang ei tuh khai um tuh tau lo i. 56Cen ning lakai a sen le a no ngai nupui khai a sen le a no ze manin laipua ah rin a ke in vak tuh lo mi cia nuu in a kang ai huamhnak a pa le a fapa le a fenu te khiah 57a ke kualak ai suakhnak a sul le a songai tehnak a fate khiah iksik tuh i. Ziangmanti fangin amah in ning raalte in ning kawl dawng ah ning rim rauh ai ning kulh manin ziang ei tuh khai um tau lo manin a thup niu in a fate khiah ei tuh i.
58He a hmingthang ngai le kihkul ngai BAWIPA NING PATHIAN hming khiah ning kih thai tuhin he ca-uk songai nganhnak dan upadi thute khiah a kung niu in hlun hlah leisikhaw, 59Bawipa in ning vumah le ning tesin fate hnenah a rauh hngehnge in urhnak lian puipui thawn a rai ngai ning ur ruai tuh i. 60Ciazolo ah ning lauhnak Izip ramai urhnak khiah ning kawih sah leh tuh ai ning vumah bek tuh tial i. 61Cen he ca-uk songai ngan lohnak urhnak phun cang khai Bawipa in ning thi hlan lo ning vumah hleng ruai tuh i. 62Bawipa ning Pathian aw ning ngai lo manin van ai arsi zah ning i napui ai a tlawm niu lek ning taang tuh i. 63Bawipa in ning lakah a pha bawn tuh le ning zaai ruai tuhin ang bangin Bawipa khai ning hnawmcan tuh le zai khai ning cang tuh lo in ning bawn tuhin ang tuh i. Cen ning co hmun tuh ramin ning phai tuh sio i.
64Ciafangin Bawipa in laivum khat lam in khat lam tianah midang kualakah ning zaih tuhai ciata ah ningmah le ning paate ai ling awng lohnak thing le lungto pathiante na per sah tuh i si. 65Cia mite phun lakah com nia nai tuh lo i si. Ning keruh khai comhmun tuh nai tuh lo i. Ikhalselai Bawipa in ciata ah thin tlohnak le mit vaihnak le thin rimsuhnak ning pe tuh i. 66Ning nunhnak khiah zai cang tuh ling lo in um tuh i si. Sun le zan ning lau tuhai ning nunhnak khiah ning hliah tuh lo i. 67Ning thin lau ze manin le ning mit ai ning hmuhnak manin, zing fangin, ‘Aw, zanlam i hang selai!’ti tuh i si. Zanlam fangin, ‘Aw, zinglam i hang selai!’ ti tuh i si. 68Ciafangin lamlakah kai in, ‘Hmu awng tuh lo i hang i si.’ ti ai ning rel awnghnak Izrip ramah Bawipa in timbaw thawn ning phur leh tuh i. Ciata ah ning raalte in pasal ceng le nupang ceng in ning zuar tuhai aisu in khai ning lai zuam tuh lo i.” ti in rel i.