Deuteronomy 24

<<  DEUTERONOMY  24  >>

1Mi pakhat in nu hoi in cia nuu in sual hnak nai manin a pa in lungkhim lo manin a mahnak lai khiah nganin cia nuu kut ah pe in a inn in suak ruai fangin, 2cia nuu khiah mi dangin nu leh thio in, 3cia pa in khai he nuu khiah hua in mahnak lai khiah nganin cia nuu kut ah pe in a inn in suak ruai i tu seh, ihlahle cia paa khiah thi lekhaw, 4amah khiah rim ruai zo manin a ma tu a hmasa a pa in cia nu khiah nu leh ma seh. Ziangmanti fangin he khiah Bawipa hmai ah a        ningdulkul i. Bawipa ning Pathian ai ro ning pehnak ramah sual tuh lo i si.

5Mi pakhat in nu thar nai lekhaw amah khiah raaltawng tuhin feh ma seh. Cen natuan tuh tavuan khai nai ma seh. Kum khat song inn ah um in a nu khiah ang ruai tu seh.

6Mi pakhat ai rong rial hnak lungto lungrial a cungta le a hniata khiah amahkhan hnak tuhin  lang sah tuh lo i si. Ziangmanti fangin cia       lungrial khiah a nuncawm hnak i.

7Mi pakhat in Israel mi a unau khiah ru in vit in mi hnenah zuar lekhaw cia pa khiah thi kul tuh i. Ning songin cia misual pa khiah rek tuh lio i si.

8Phaarhnak ur suak fangin phungki Levi te ai ning cukhnak bangin a kungniu in hlunin bawn tuhin ralring tuu-ih. 9Izip ramin ning suak fangin Bawipa ning Pathian in Miriam hnenah bawnhnak khiah hih tuu-ih.

10Na unau thil zawn le sikhaw a innah kawi in amahkhan hnak thilri lang tuhin lut tuh lo i si. 11Sumpua ah ding tulai amahin cia amahkhan hnak thil khiah kawih tu seh. 12Cia pa khiah mi farah ilekhaw amahkhan hnak thil khiah zankhuavar na hnenah khawi sah tuh lo i si. 13Ikhalselai nitla fangin cia amahkhan hnak thil khiah khirh leh tuh i si. Ciafangin amah khiah a pon sil in it thill tuhai hmuifu na bur tuh i. Cia khiah Bawipa ning Pathian hmai ah na dikcang hnak cang tuh i.

14Ning kawl dawng song ai um ning ramai  ramdang mi i tu seh, cen na unaute i tu seh,  cia pa khiah mi farah le thil sam hnak naitu a ngahnak hnenum khiah nemh tuh lo i si. 15Ni siar in a hlawhtham khiah nitla hlanah pe tuh i si. Ziangmanti fangin amah khiah mi farah i ai cia a nihlawh khiah a ummhnak i. Cialo fangin amah in Bawipa hnenah kap ngai khaw na sual tuh i. 16Paate khiah a fate ca in rek tuh lo i si. Cen a fate khai a paate ca in rek tuh lo i si. Ikhalselai aisu khai amahte sual hnak ca ten in rek tuh i si.

17Mikhual le paate nai lo te khiah a hmanlo in thukhan sah tuh lo i si. Cen amahkhan hnak ca in hmaitong nuu thuam khiah lang sah tuh lo i si. 18Ikhalselai Izip ramah mi cengfa i awng ai Bawipa ning Pathian in cia ramin luang ning tlan khiah hih tuu-ih. Ciamanin hetih bangin bawn tuhin ning rel ing.

19Ning lo ai rong ning khawm fangin ning lo ah rong tel khat hai pang leisikhaw, let leh in cia rong tel khiah lang leh tuh lo i si. Bawipa ning Pathian in ning kut ai perhnak hmuah hmuifu ning bur thai in cia rong tel khiah mikhual le paa nai lo te le hmaitong te ca in hlum tuh i si. 20Cen ning oliv thing khiah ning hlin fangin a kaak vumah kaai tuh lo i si. Cia khiah mikhualte le paate nai lo te le hmaitong te ca i tuh i. 21Cen ning vuandum songai capitti ning loih fangin a ciang liang in loih tuh lo i si. A taanghnakte khiah mikhual le paate nai lo le hmaitong te ca i tuh i. 22Izip ramah cengfa  awng khiah hih tuu-ih. Ciamanin hetih in bawn tuhin ning ruai ing.

<<  DEUTERONOMY  24  >>