1Na unau kawlpaw le tuu khiah lamtler hmu lesikhaw a ling lo in um khel tuh lo i si. Ikhalselai cia suumte khiah na unau hnenah kawih sah tuh i si. 2Na unau khiah na nong ah um lo in i tu seh, cen na unau khiah ling hlah lesikhaw, cia suum khiah na unau in sii hlan lo na inn ah tlun tuh i si. Na unau in sii leh fangin pe leh tuh i si. 3Ciatih bangin a lak i tu seh, a thilthuam i tu seh bawn tuh i si. Cen na unau in thil pai ruai in nang in tawk lesikhaw thup lo in ciatih bangin bawn tuh i si.
4Na unau lak i tu seh, kawlpaw i tu seh lam hiang ah tlok hmu le sikhaw a ling lo tuah tuh lo i si. Amahte khiah lampui ah do leh tuh i si.
5Nupang in pasal thuam sil ma seh. Cen pasal in khai nupang thuam sil ma seh. Ciabang ai bawntute khiah Bawipa ning Pathian in ningdul i.
6Lamlak ah vaniu bu khiah thing vumah i tu seh laihnia ah i tu seh, tawk in cia bu songah a niu i tu seh, a tii i tu seh, um lekhaw cia vaniu khiah a niu thawn luak tuh lo i si. 7Cia vaniu khiah luat ruai in a niu te lek luak thai i si. Ciafangin nun na nuam tuhai nun na sau tuh i.
8Inn thar ning sa fangin cia inn vumah varenda thawn kulh tuh i si. Cia fangin ning inn vumin mi tlok pang fangin mi thi lekhaw mawh ning hluk tuh lo i.
9Ning vuandum songah rong cii a phun cang cing tuh lo i si. Cialo fangin na cing hnak rongcii a thai le na capit vuandum ai a thai khiah rim tuh i.
10Kawlpaw le lak thawn hmunkhat in ning lo khiah vaai tuh lo i si.
11Sahmul le vo thawn rawihhnakte bang thilthuam khiah a rawih in sil tuh lo i si.
12Ning silhnak thilthuam a ning li ah a par dah tuh i si.
13Mi pakhat in nu hoi in cia nuu thawn itkhat hnua fangin cia nuu khiah hua in, 14cia nuu khiah zakthi kul in mawhhluk in hming sia ruai in, ‘He nuu khiah nu ai itkhat fangin amah in midang thawn itkhat zo khiah tawk ing.’ti in thu nai lekhaw, 15a paa le a nuu in khua kawl dawng ah khua upate hnenah cia nuu sual lo i ti ai tetti khan tuhin thil kawih tu selai, 16cia nupang paa in khua upate hnenah, “I fenu khiah he pa ai nu tuhin pe ai tunin amah in hua i. 17Cen tunin amah khiah zakthi kul in mawhhluk ai, ‘Na fenu khiah midang thawn it zo i.’ti in i ti i. Ikhalselai midang thawn it awng lohnak tetti khiah hete i.”ti in rel tuh i. Ciafangin cia paa in khua upate hmaiah cia pon khiah pharh tuh i. 18Ciafangin cia upate in cia tlangval pa khiah cawh tuhai, 19amah khiah tangka shekel 100 kuan ruai tuh i. Ziangmanti fangin amah in Israel tlangval thawn it awng lo fenu khiah hming sia ruai i. Amah in cia nuu khiah nu tuhai a nun song cia nuu khiah ma thill tuh lo i. 20Ikhalselai a relhnak khiah hmanin cia nupang in mi dang thawn it awng lohnak tettikhan hnak nai hlahlekhaw, 21khua upate in cia nuu khiah a paa inn dawngkham ah kawih tuhai ciata ah lungto thawn rek tuh i. Ziangmanti fangin cia nuu in Israel songah zakthil kul bawn ai a paa inn rori ah phatemah cang i. Ciatih bangin ning lakai sual tu khiah rek tuh si.
22Mi pakhat in mi dang nu thawn itkhat lekhaw cia nuu thawn itkhat tu pa le cia nuu khiah a panih in rek tuh i si. Ciatih bangin mi sual te khiah Israel songin rek tuh i si.
23Midang thawn itkhat awng lailo fenu pakhat khiah a pa in thawlthan ben fangin a dang pasal pakhat in khua songah tawkin it pui lekhaw, 24nupang nuu khiah khua songah inapui ai au lo manin le cia pasal in mi dang nu thawn sual manin a panih in khua kawl dawng ah kawih in lungto thawn rek tuh i si. Ciatih in ning songin mi sual khiah rek tuh i si.
25Mi pakhat in a thawlthan sa fenu pakhat khiah ram lakah tawkin cia pa in cia nuu khiah itpui bel lekhaw cia paa lek rek tuh i si. 26Ikhalselai cia nupang khiah cawh tuh lo i si. Cia nuu in thih tlak in sual lo i. Ziangmanti fangin mi pakhat in a ompui thawn tawng bangin he thu khai cia bang i ve i. 26Ziangmanti fangin tlangval pa in cia fenu khiah khuapua hampalakah tawk ai cia thawlthan sa nupang in au napui ai a o tu tuh um lo i.
28Tlangval pakhat in midang thawn itkhat awng lai lo le aisu in khai thawlthan lai lo fenu khiah pom in itkhat in cia thu khiah mi in ling sah lio lekhaw, 29cia nuu thawn itkhat tu paa in fenu ai pa hnenah tangka shekel 50 pe tu selai cia fenu khiah a nu cang tuh i. Ziangmanti fangin cia pa in cia nu khiah niam ruai lio i. A nun song cia nuu khiah ma siang tuh lo i si.
30 Aisu in khai a paa nu khiah nu tuh lo i. Cen a paa ithmun khiah kawngkolh in dah ma seh.