1Abib hla khiah ul tuu-ih. BAWIPA ning Pathian hnenah Khelhnak Passover puai bawn tuu-ih. Ziangmanti fangin Abib hla songah BAWIPA ning Pathian in Izip ram songin zanlai in ning suah i. 2Ciamanin ning Passover raithawihnak kawl paw le tuu le me te khiah BAWIPA in a hming dah hmun tuhai rilhnak hmunah BAWIPA ning Pathian hnenah hlu tuh i si. 3Cia sa thawn col tel sangreu ei tuh lo i si. Ciamanin ning nun song Izip ramai ning tlan nia khiah hih thai in cia sangreu khiah rimsu tuarhnak ca sangreu i manin cia sa thawn col tel lo sangreu khiah ni sarih song ei tuh i si. Ziangmanti fangin Izip ramin a hnawraw in tlan awng i si. 4Ni sarih song ning ramah col khiah um ruai tuh lo i si. Cen ni hmasaber khuathim ngomai ning hluhnak sa khai zan khuavar tian taang ruai tuh lo i si. 5BAWIPA ning Pathian ai ning pehnak kawl dawng song tenah cia Passover khiah hlu tuh lo i si. 6Ikhalselai BAWIPA ning Pathian ai a hming haih hmun tuhai ril hmunah Izip ramai ning tlan awng bangin nitla hnua khuathim ngom fangin Passover khiah hlu tuh i si. 7Mei in em tuhai BAWIPA ning Pathian ai ril hmunah ei tuh i si. A thangha fangin tho in ning buk ah kawi tuh i si. 8Col tel lo sangreu khiah ni ruk song ei tuh i si. Ni sarih nia fangin BAWIPA ning Pathian hnenah a cianghlim pum khawm nai tuh i si. Cia nia ah na per tuh lo i si.
9Zarh sarih khiah siar tuu-ih. Vangkawn thawn rong ning khawm pan nia in zarh sarih khiah siar pan tuh i si. 10BAWIPA ning Pathian hnenah Zarhte Puai ul tuh i si. BAWIPA ning Pathian ai hmuifu ning burhnak thawn a siang ngai in ning kut in hlu tuh i si. 11BAWIPA ning Pathian hmai ah ning fapa le ning fenu le ning pasal hnenum le ning nupang hnenum le ning kawl dawng songai Levi le ning lakai ramdang mi le paa nai lo te le hmaitong te kawmin BAWIPA ning Pathian in a hming dah hmun tuhai a ril hmunah ang tuh i si. 12Izip ramah mi sal le cengfa i awng khiah hih tuh i si. Ciamanin he thukhamte khiah a kungniu in hlun tuh i si.
13Ning fangcil hmunin le ning capitti rial hmunin ning khawm ben fangin Tabernacle Puai khiah ni sarih ul tuh i si. 14Ning puai ah ning fapa le ning fenu le ning pasal hnenum le ning nupang hnenum le ning kawl dawng songai umtu Levi le ramdang mi le paa nai lo te le hmaitong te kawmin ang tuh i si. 15Ni sarih song a cianghlim Puai khiah BAWIPA ai ril hmunah BAWIPA ning Pathian hnenah ul tuh i si. Ziangmanti fangin BAWIPA ning Pathian in ning rong le ning kut ai ning perhnak na hmuahhmuah khiah hmuifu ning bur tuhai ciamanin ning ang tuh rori i. 16Ning pasal hmuah kum khat ah vel thum BAWIPA ai ril hmunah BAWIPA ning Pathian hnenah kawi tuh i si. Cia khiah Col tel lo Puai le Zarhte Puai le Tabernacle Puai te i. Amahte in BAWIPA hmai ah kut lo lek in kawi tuh lo i. 17Aisu hmuah in BAWIPA ning Pathian ai ning pehnak hmuifu bangin a ben zah pe tu seh.
18BAWIPA ning Pathian ai ning pehnak ning kawl dawng ah thukhantu le mi upate khiah ningmah hin bangin dah tuh i si. Amahte in mite khiah a hman ngai in a thukhan sah tu seh. 19A hman lo in thukhan tuh lo i si. Daihce hnak nai tuh lo i si. Nawhthuh khai lang tuh lo i si. Ziangmanti fangin nawhthuh in mifimte mitcaw ruai ai dikcang mite pon khiah kon ruai i. 20BAWIPA ning Pathian ai ning pehnak ram khiah ning co thillhnak tuhin a hman lampui lolek hlun tuh i si.
21Thing vumah zukhnak thing khan khiah BAWIPA ning Pathian hnenah ning sahnak awlta hiangah bir tuh lo i si. BAWIPA ning Pathian ai huahnak a cianghlim khuam khai tung tuh lo i si.