Deuteronomy 11

<<  DEUTERONOMY 11  >>

1Ciamanin BAWIPA ning Pathian khiah it in a aphnak thu le a dan upadi le a thukhanhnakte le a thukhamte khiah hlun tu tio-ih. 2Cen tunnia ah BAWIPA ning Pathian ai ning tiamhnak le a lian ngai BAWIPA le a huthawmte le 3Pharoah hnenah le a ram Izip ai Pathian ai bawnhnak le hnikhnaihnakte le 4Izip raalkap te le a siphuh lengte in ning hnawh fangin Tipui San ah ti thawnin cum ruai ai tunnia tian amahte khiah BAWIPA in hnawmcanhnak le, 5heta ning hleng tian nelrawn songah ning ca ai ning bawthnak le, 6Reuben fapa Eliab fate Dathan le Abiram te hnenah bawnhnak: laipua in a kaa khiah  hong ai amahte le a innkua le a bukte le amahte naihhnak hmuah Israel mite songin lem berhhnak thute ling lo le hmu lo tu ning fate hnenah rel i lo ing.  7Ikhalselai ning mit in BAWIPA bawnhnak a lian ngai ngai khiah hmu zo i si.

8Ciamanin tha ning hat in ping tuhai ning ke thawn tanhnak ram ah fehin ping in, 9ning paate le a tesin fate hnenah BAWIPA in pe tuhai khamhnak ‘cawhnawi le khoitilu luang hmun ram’ ah ning nun ning sau thai in, tunnia ai i ruaihnak thukham hmuahhmuah khiah hlun tuh i si. 10Ziangmanti fangin ping tuhai ning feh hmun ram khiah ning suak hmun ram Izip ram bang i lo i. Izip ramah tu rongci cing ai tihang dum bangin ning ke thawn tiburh kul i si. 11Ikhalselai ping tuhai ning ke thawn tanhnak ram khiah mual le rawn umhmun ram i ai van ai ruahti ding i. 12Cia ram khiah BAWIPA ning Pathian lakah a thupui ngai i. BAWIPA ning Pathian in cia ram khiah kum thar ai panin kum bo tian a mit in sik ngio i.

13Ciamanin ningte in i thukham khiah a kungniu in hlun in BAWIPA ning Pathian khiah it in amah na khiah ning thinlung veksen le ning rauhla veksen thawn per sah leisikhaw, 14ning ram ca in a cu bangin ruah sii ruai tuh ing. Ning rong le ning capittizu thar le thau te ning khawm thill thai in a hmasa ruah le a hnuata ruah si ruai tuh ing. 15Cen ning suumte ca in hampalak ah hampa po ruai tuh ai ning te in ei in ning kham tuh i.’ 16Ciamanin ning thin khiah ning zawl sah in tlamtler in pathian dang na khiah per sah in bia ngah tuh zel khiah ralring tuu-ih. 17Cialo fangin BAWIPA khiah ning lakah thinraw ruai tuh le amah in van dawngkham khiah ning kham sah tuh ai ruah si tuh lo i. Ciafangin laipua songin zai khai po tuh lo ai BAWIPA ai ning pehnak ram pha songin ning rall tuh vut i.

18Ciamanin he i thute khiah ning thin songah khawi in hnikhnaihhnak tuhin ning kut ah pen in ning mit laklawh ning calpang ah khai awr tuu-ih. 19Cia thu khiah ning fate cuk tuh i si. Ning inn songah ning to fangin le lam lakah ning vak fangin le  ning taal fangin le ning tho fangin cia thu  thute khiah rel tuh  si. 20Ning dawngkham ah le ning kawl dawngkham ah ngan tuh i si.  21BAWIPA in ning paate hnenah pe tuhin khamhnak ramah ningmah le ning fate nunhnak khiah  laipua vumah van um song hmuah in nun ning sau ruai tuh i.

22Ziangmanti fangin kaimah ai ning ruaihnak he thukham hmuahhmuah khiah hlun in BAWIPA ning Pathian khiah it in a lampui ah vakin amah khiah a kho ngai in pom in lep ngio leisikhaw, 23BAWIPA in he mi phunte khiah ning hmai in ning hnawt sah tuh sio ai ningte in ning hnak ai lian sawn le cak sawn mite khiah hnawt tuh sio i si. 24Ning ke ai tlawhhnak ram hmuah ningmah ram cang tuh i. Nelrawn le Lebanon le Zupfraitis Runpui ai panin Nitla hmunlam ai Tipui tianin ning ram cang tuh i.  25Aisu in khai ning tawng ben tuh lo i. BAWIPA in ning rel bangin ning tlawh hmun ram minungte in ning kih tuh le ning lau tuhin BAWIPA ning Pathian in bawn tuh i.

26Sik tuu-ih, ning hmai ah tunnia ah hmuifu le awrsia camhnak ning dah sah ing. 27Tunnia ai ning ruaihnak BAWIPA ning Pathian thukhamte hlun leisikhaw hmuifu ning bur tuh i. 28Cen BAWIPA ning Pathian thukhamte khiah hlun lo in tunnia kaimah ai ning ruaihnak lampui in lamtler in ning ling awng lohnak a dang pathiante khiah hlun leisikhaw, awrsia camhnak ngah tuh i si. 29BAWIPA ning Pathian in ning ping tuhhnak ramah ning kawih fangin hmuifu khiah Kerizim Mual vumah dah tuh i si. Cen awrsia camhnak khiah Ebal Mual vumah dah tuh i si. 30Cia mual te khiah Moreh ai makeng thing hiang ai Kilgal  ralkhat ai zawllai ram ai umtu Khanaan mite ram songai nitla hmunlam Jordan kaan lamah i lo im? 31Ziangmanti fangin ning te in BAWIPA ning Pathian ai ning pehnak ram ping tuhin feh tuhin Jordan run khiah tan tuh le cia ram khiah ping tuhai cia ramah um tuh i si. 32Tunnia ai ning hmai ah i dahhnak dan upadi le thukhanhnakte khiah a veksenin hlun tuhin ralring tuh i si.

<<  DEUTERONOMY 11  >>