Deuteronomy 1

<<  DEUTERONOMY 1  >>

1He thute khiah Moses in Israel mite hnenah Paran, Tophel, Laban, Hazeroth le Zizahab laklawh ai Suph ralkhat zawllai hmun Jordan run in helam nelrawn songah rel i. 2Cia khiah Horeb in Kadesh Barnea khiah Seir Mual lamin feh in ni hlaikhat rai i. 3Kum sawm li hnak kum le hla khat le ni khat nia fangin BAWIPA in Moses hnenah a thukham khiah Israel mite ca in pe bangin Moses in Israel mite hnenah rel i. 4Heshbon ai umtu Amor kumpibawi Sihon le Edrei ai Astaroth ai umtu Bashan kumpibawi Ok te rek sek ben fangin relhnak thu i. 5Jordan in he lam sawn Moab ramah Moses in thukham khiah hetih bang in cuk i: 6BAWIPA kin Pathian in Horeb ah, ‘He mual vumah a raipui um zo i si. 7Thawn in feh tu i lai Amor mual vumah le a hiang ai zawllai hmun ramah le mual le rawn le Hlanglam le tipui varkam le Khanaan mite ram le Lebanon le Zufraitis Runpui tianin feh tuu-ih. 8Ning hmai ah lairam ning dah sah zo ing. Ning paate Abraham le Aizek le Zakuk te hnenah le a tesin fate hnenah pe tuhin BAWIPA in thukham awnghnak ram ah feh in ping tuu-ih.’ti in kin rel i.

9Ciafangin kai in ningte hnenah, ‘Kaimah lek in ning phur ben lo ing. 10BAWIPA ning Pathian in ning zaai ruai ai tunnia ah van ai arsi zah in ning tam i. 11Ning paate BAWIPA Pathian in a thawng a thawng in ning zaai ruai ai thu ning kham bangin hmuifu lo ning bur tu seh. 12Kaimah lekin a kontih in ning thu le ning thilri le ning camhnak khiah ning phur sah ben tuh ing? 13Ning hin songai mifim le thiamhnak le linghnak naite khiah ril tu i lai ning uktu tuh in dah ngang,’ti in ning rel fangin  14ning te in, “Nangmah in kin bawn ruaihnak khiah pha i.’ti in aw i si. 15Cia manin kai in khai a fim le a thiam te khiah ning hin songin ril ai ning te thawng khat, za khat le sawm nga le sawm khat te vumah uktu tuhin mi ning dah sah ing. 16Ciafangin ning thukhan tute hnenah, ‘Ning unaute thu khiah ngai sah in a dikcang niu in mi pakhat le a unau le amah thawn ai mikhual te khiah a thu khan sah tuu-ih. 17Cen thu ning khan fangin aisu khai hmaison tuh lo i si. A cik le a liante thu khiah ngai sah tuh i si. Aisu hmai khai kih tuh lo i si. Ziangmanti fangin thu khantu khiah Pathian i. Ning ca ai a harze thu khiah i hnenah kawih tu i lai kaimah in ngai tuh ing.’ ti in ning rel ing. 18Ciateng in ning bawn tuhhnak hmuahhmuah ning ruai ing.

19Ciamanin kin khai BAWIPA kin Pathian in kin ruai bangin a lian ngai le a sia ngai nelrawn songin Amor te mual vumah feh i sing. Ciafangin Kadesh Barnea ah hleng i sing. 20Ciafangin   kai   in, ‘BAWIPA kin Pathian ai kin pehnak Amor mual ah hleng i hang i si. 21Sik tuu-ih. BAWIPA ning Pathian in khia ram khiah ning hmai ah ning dah sah zo i. Ning paateBAWIPA Pathian in ning rel zo bangin hong in ping tuu-ih. Lau mah ih. Cen thin khai nau mah ih.’ti in ning rel ing. 22Ciafangin ning veksenin i nong ah kawi ai, ‘Kin hlanin mite hlat nga singkhaw anite in kin ca in cia ram khiah sii tu selai kin hong hmun tuh lampui le kin hleng hmun tuh khuate thu khiah kin than leh tu seh.’ti in ti i si.  23Ning thu khiah lung i khim i. Ciamanin ning lakai mi hlainih khiah ning hin songin mi pakhat ten in ning ril ing. 24Anite khai mual vumah hong ai Eskhol Rawn zawllai ah hleng ai cia ram khiah cul i. 25Amahte in cia ram ai thingthai khiah amahte kut in lang ai kin hnenah kin tlut i. Cen thu khai, ‘BAWIPA kin Pathian in kin pehnak ram khiah a pha ram i.’ti in kin than i. 26Ikhalselai ningte in hong ning nuam lo ai BAWIPA ning Pathian ruaihnak khiah el ai 27ning buk songah, ‘BAWIPA in kin hua manin Amor te kut songah kin rek tuhin  pe tuhin Izip ramin kin fehpui i. 28Kin unaute in kin thin kin nau ruai ai, “Cia ram ai cia mite khiah kin hnak in lian khai lian sawn ai sang khai sang sawn i. A khuapui pui khai a lian ngaingai i ai van banin renhnak i. Ciazolo ah ciata lakah Anakim fate khai hmu i ing.” ti in kin rel manin ‘ Akonah kawi tuh i sing?’ti in rel i si. 29Cia fangin kai in, ‘Lau mah ih. Amahte khai kih mah ih. 30Ning hmai ai feh tu BAWIPA ning Pathian in ning mit hmuh in Izip ramah ning bawt sah bangin ning tawng sah tuh i. 31Cen a paa in a fapa phur bangin nelrawn songah heta ning hleng tianin ning feh hmun cang ah BAWIPA ning Pathian in ning phur i.’ ti in ning rel ing. 32Ikhalselai cia hmuahhmuah ling napui ai BAWIPA ning Pathian khiah sang lo i si. 33Amah in ning buk sa hmun tuh ning si sah tuhin le ning feh hmun tuh ning hmuh tuhin zan fangin mei, sun fangin mairo thawn ning hmai ah feh i.

34Ciafangin BAWIPA in ning aw khiah ning za sah fangin thinraw ai  35‘A paate hnenah i khamhnak ram khiah he a siava san he minungte in hmu tuh hrimhrim lo i. 36Jephunneh fapa Kaleb lek in hmu tuh i. Amah in BAWIPA khiah a vuva in hlun manin a ke ai tlawh hmun ram khiah amah le a fate hnenah pe tuh ing.’ti in thukham i. 37Ciafangin BAWIPA khai ningmah manin i lakah thinraw ai, ‘Nang khai khia ramah lut tuh ce lo i si. 38Ikhalselai na hmai ah ding tu Nun fapa Joshua in lut tuh i. Amah khiah so tu. Ziangmanti fangin amah in Israel mite in cia ram co ruai ben tuh i. 39Ciahlai ah tunnia ah a pha le a hnawm ling lai lo ning fate khiah amahte in hawmcan tuh i, ning tihnak te in cia ram songah lut tuh i. Amahte hnenah cia ram pe tuh ing. Amahte in cia ram co tuh i. 40Ikhalselai ningte tu let tu i lai Tipui San hmun lam Lampui  in  nelrawn songah feh tuu-ih.’ti in kin ti i.

41Ciafangin ningte in i hnenah, ‘BAWIPA lakah kin sual te i. BAWIPA kin Pathian in kin ruai bangin hong nga singkhaw tawng nga sing.’ti in i sawn i si. Ning veksenin raal thilthuam vong ben fangin mual vumah hong tuhin a cialep in pai i si. 42Ciafangin BAWIPA in i hnenah, ‘Amahte khiah, “Hong khai hong mah ih. Tawng khai tawng mah ih. Ziangmanti fangin kaimah khiah ning lakah um lo ing. Ning raalte in ning neh tuh i.”ti in rel tu,’ti in i ruai i. 43Ciamanin ning rel ing. Inapui ai ning te in i ngai lo ai BAWIPA ruaihnak khiah el ai mual vumah hong tekto i si. 44Ciafangin mual vum ai umtu Amor te in ning tawng ai khoi bangin ning hnawh ai, Seir in Hormah tian ning hnawt i. 45Ciafangin ningte khai tlung ai BAWIPA hnenah kap i si. Ikhalselai BAWIPA in ning aw khiah ning ngai sah lo ai a bil in khai ning za sah lo i. 46Ciamanin cia ramah ning um zah in Kadesh ah ni tampui um i si.

<<  DEUTERONOMY 1  >>