Daniel 9

<<  DANIEL 9  >>

1Khaldean mite uk tu tuhin kumpibawi cang ruai hnak Mede te phun Ahasuras fapa Darius ukhnak kum khat fangin, 2a ukhnak kum khat fangin, Bawipa in Jerusalem khiah kum sawmsarih song zai khai bek lo in dah tuh khiah prawfet Jeremiah in rel awng ai cia khiah kaimah Daniel in Lai Cianghlim ca-uk songah siar in kum zai zah tian i tuh i ti khiah ling ing.

3Ciafangin kai khai rongul le vaidip sil in vutkuang lakah to in sawngen in le ninghio kun tuhin Bawipa Pathian hnem lamah sik ing. 4Ciafangin kai khai Bawipa i Pathian hnenah i sual khiah phorh ai sawngen ai, “Aw Bawipa, nangmah khiah a lian le ngaihsun urkul ngai Pathian i si. A it tu te le a thukham hlun tu hnenah a thukham le a ngaihhar khiah khim ruai tu Pathian i si. 5Kin te in na dan upadi le na thukhan hnak te khiah hlun lo in a rauh ngai in sual ai na thu khiah ngai lo i ing. 6Cen na hming in kin kumpibawipa te le kin bawi te le kin paate le ram song ai mi te hnenah thu rel tu na hnenum prawfet te rel hnak khai ngai lo i ing. 7Aw Bawipa, nangmah ian dik na caang i. Kinmah zong tunnia tian in zakthikul i ng. Ziangmanti fangin amahte in na lakah hlotlau in nung manin Judah mite le Jerusalem ai um tute khiah a hla ngai le a nong hmun ram caang ah hnawt i si. 8Aw Bawipa, kin kumpibawite le kin bawite le kin paate kawmin zakthikul i ing. Ziangmanti fangin na lakah kin sual zo i. 9Kin te in Bawipa kin Pathian khiah tawng napui ai Bawipa kin Pathian ian in ngaihhar hnak le sualhlat hnak nai i si. 10A hnenum a prawfette in kin hmai ah dah hnak a upadi dan te khiah hlun lo in Bawipa kin Pathian aw khiah ngai lo i sing. 11Israel mi veksen in na upadi dan khiah hlun lo ai na aw khiah ngai lo in tlan tekto i. Ciamanin Pathian hnenum Moses pe hnak Upadi Dan ai cukcam hnak le thukham hnak khiah, kinte in amah lakah sual manin kin vumah kin burh i. 12Thu kin khan sah tu thukhan tu te hnenah le kin hnenah a relhnak thu khiah khim ruai in kin vumah rimsu hnak lian pui khiah hleng ruai i. Ziangmanti fangin Jerusalem vumah bawnhnak khiah van hang hnia ah bawn awng lo i. 13Moses pe hnak Upadi Dan song ah ngan hnak bangin, he rimsu hnak hmuahhmuah a veksen in kin vum ah hleng i. Ikhalselai kin te in kin Bawipa kin Pathian hnenah sawngen in kin sualhnak lak in her in na thuhman khiah ling tuhin tek lo i ing. 14Ciamanin Bawipa in he rimsu hnak khiah kin vumah hleng ruai i. Ziangmanti fangin kin te in a aw ngai napui lo ai, Bawipa kin Pathian khiah a naper hnak veksen lakah dikcang in per i. 15Na minungte huthawm lianpui thawn Izip ramin suah ai tunnia ai bangin na hming khiah thang ruai tu aw Bawipa kin Pathian, sual zo i ing. Pha lo bik in bawn zo i ing.

16Aw Bawipa, na dikcanghnak bangin, na thinraw hnak khiah a cianghlim na mualtlang na khua Jerusalem in tlan ruai tuh in saw na ngen ing. Ziangmanti fangin kin sual manin le kin paa te sual manin Jerusalem le na minungte khiah kin hiang mite zauhsuam hnak kin cang i. 17Ciamanin, kin Pathian, na hnenum sawngenhnak le a ninghio kun hnak khiah ngai sah tulai, Bawipa ca in zaikhai bek lo ai um hnak na temple vumah na mithmai khiah zal ruai leh tu. 18Aw i Pathian, na bil thawn kin ngai tulai kin za tu. Na mit khiah thak tulai, zaikhai bek lo ai um tu kin te le na khuapui Jerusalem khiah sik tu. Ziangmanti fangin kin ninghio kun hnak khiah a dikcang per manin na kun i lo ai na ngaihharhnak manin na kun ing. 19Aw Bawipa, kin za tu! Aw Bawipa, sual kin hlat tu! Aw Bawipa, kin ngai tulai kin bawm tu! I Pathian, nangmah ca in tirhting mah. Ziangmanti fangin na khuapui Jerusalem le na minung te khiah na hming thawn ko hnak i.”ti in ngen ing.

20Ciatih in kai khai i sual hnak le i minung Israel mite sual hnak khiah i phorh ai i Pathian ai a cianghlim mualtlang ca in Bawipa i Pathian hnenah ninghio kun laitak fangin, 21ciatih bang in sawngen in i pong teng fangin, a ngom in i mithla thawn i hmu hnak mi pa Kabriel khiah a rang ngai in lo zuang ai i hnenah zanlam a hlu pe cu fangin hleng i. 22Amah in i hnenah, “Aw Daniel, nangmah in ling thai in kaimah khiah tunin kawi i hang ing. 23Na ninghio kun pan sawng fangin Pathian in na sawngen hnak bang in na pe ai cia thu na rel tuh in kawi ing. Ziangmanti fangin nangmah khiah Pathian in na it rauh i. Ciamanin cia mithla ai na hmu hnak thu khiah ruat tulai ling tu.

24Na minung te le a cianghlim na khuapui Jerusalem ca in, upadi dan lakah sual awl tuh le, sualhnak khiah bo ruai tuh le, sualhnak khiah khuk sah tuh in le kumzangza dikcang hnak hleng ruai tuh in le Mithla ai hmu hnak te le prawfet thu rel te vumah tacik khet tuh le a Cianghlim Ber Hmun khiah thau pawh tuhin, zarh sawmsarih khiah dah zo i. 25Ciamanin he khiah ling tu. Jerusalem khiah rem leh tuhin le sa leh tuhin thu suah hnak cu ai pan in Messiah Kumpibawipa hleng tian khiah zarh sarih le zarh sawmruk le zarh nih i tuh ai lentawng te le khua renhnak sen te khiah harsa ngai in sa leh tuh i. 26Zarh sawmruk le zarh nih fangin, Messiah khiah rek tuh lio i. Ikhalselai amah ca in rek tuh lo i. Ciafangin a hleng tuh lai bawipa ai minungte in cia khuapui Jerusalem le temple khiah hnawmcan tuh i. Tilawi thawn bo ruai tuh i. Raaltawng hnak a bo tian in zaikhai bek tuh lo in sungphiat zo i. 27Ciafang in amah in mi tamngai thawn zarh khat song thu kham dun tuh i. Ikhalselai zarh laiteng ah amah in raithawi le a hlu te khiah pe awl ruai tuh i. Ciafangin a tuat cia hnak bang in zaikhai bek lo ai bawn tu pa bo hlan lo, ningdulkul ko vumah zaikhai bek lo ai bawntu pa khiah to tuh i.”ti in i rel i.

<<  DANIEL 9  >>