1A kumpibawi ram a veksen in uk tu tuhin Darius in ram-uk tu za le kul dah tuhin le 2hete vumah mangki pathum dah tuhin lungkhim ai cia mangki pathum lakah Daniel khiah pakhat lo i. Kumpibawi in a sung tuar lohnak tuhin he ram-uk tu te khiah mangki te in khawng i. 3He mi Daniel khiah mangki dangte le ram-uk te lakah a thiam ber le a fim ber manin kumpibawipa in amah khiah a ukhnak ram veksen uk tuhin dah tum i. 4Ciamanin a dang mangki te le ram-uk tu te in kumpibawi ram ukhnak thawn senghnak lamah Daniel mawhhluk tuhin si napui ai tawk lo i. Ziangmanti fangin Daniel khiah mi rinsan tlak ngai i le khelhhnak le mawhhnak khai nai lo i. 5Ciafangin he mite in, “A Pathian thukham lamah siar lo in he Daniel lakah mawhhluk tuh tawk tuh lo i sing.”ti in rel i.
6Ciamanin he mangki te le ram-uk tu te khai kumpibawipa hnenah hmunkhat in kawi ai, “Kumpibawipa Darius, kumzangza in na nung tu seh. 7Na ukhnak songai mangki te le raalbawi te le ram-uk tu te le tlangsuak te le na khawnsil te in hmunkhat in thusawm tlang ai, aisu in khai ni sawmthum song ah kumpibawipa nangmah hnenah lo a dang pathian le mi te hnenah ninghio ngen tu khiah chintit kua songah lon tuhin kumpibawipa in dan upadi suah tuhin lungkhim tlang i. 8Ciamanin aw kumpibawipa, cia dan upadi khiah lai in ngan tulai, Medes le Persian dan upadi khiah thleng thill lo bangin, cia upadi khai thleng tuh lo in na hming thu tu.”ti in ruai tlang i. 9Ciamanin Kumpibawi Darius in a hmingthu i.
10Daniel in amahte ai nganhnak dan upadi khiah kumpibawipa in a hmingthu khiah za fangin ani khai a inn ah tlung i. Ani khai a cungta a inn khan songah a padinpauh te khiah Jerusalem ah hoi in hong ai cia nia ah vel thum a khuk caicin in ni dang in a bawn kel bangin, a Pathian hnenah sawngen in an i. 11Ciafangin he mi te khai hmunkhat in tai tlang ai Daniel in a Pathian hnenah sawngen le ninghio kun lak khiah tawk i. 12Ciafangin anite khai kumpibawipa hnenah kawi ai, “ Aisu in khai ni sawmthum song ah kumpibawipa nangmah hnenah lo a dang pathian le mi te hnenah ninghio ngen tu khiah chintit kua songah lon tuhin kumpibawipa in dan upadi khiah hmingthu i ta lo i sim?”ti in zawt i. Kumpibawi pa in, “Medes le Persian dan upadi khiah thleng thill lo bangin, cia thu khiah hman i.”ti in sawn i. 13Ciamanin amahte in kumpibawipa hnenah, “Khia Judah thawngtla mi te lakai mi pakhat Daniel in nangmah le na hmingthu hnak dan upadi khiah zai khai nam lo i. Ikhalselai ni khat ah saw vel thum ngen i, aw kumpibawipa.”ti in rel i. 14Kumpibawipa in he thute khiah za fangin, amah le amah lakah lungkhim lo rauh manin Daniel khiah luat ruai tuhin a thin songin tum pan i. A luat ruai tuh in nitla tian ruat hnelhno i. 15Ciafangin he mite khai kumpibawipa hnenah kawi ai, “Aw kumpibawipa, kumpibawipa ai hmingthu hnak dan upadi khiah Medes le Persian dan ah thleng thill lo khiah ling i si.”ti in rel i. 16Ciamanin kumpibawipa in thu pe ai amahte in Daniel khiah kawih ai chintit kua songah lon i. Ikhalselai kumpibawipa in Daniel hnenah, “A catlo ai a na naper sah hnak na Pathian in na o tuh i.”ti in rel i. 17Ciafangin lungto pui pakhat khiah kawih ai cia kua khiah kham ai Daniel cawhkuan khiah thleng tuh lo in kumpibawi pa in a hmingthu hnak a kut ruk le a tlangsuak te kutruk thawn tacik khet i.
18Ciafangin kumpibawipa khai a inn ah tlung ai cia zan khiah rong ul in um i. Cen a hnenah lasa tute khai kawih lo i. Cen mit khai mu thill nawn lo i. 19Ciafangin kumpibawipa khai zingniu in tho ai a rang ngai in chintit kua ah kawi i. 20Chintit kua ah a hleng fangin, lungsia hnak aw thawn Daniel khiah pon ai, “A nung mi Pathian hnenum Daniel, a catlo ai a na naper sah hnak na Pathian in, chintit te hnenin na o ben awm?”ti in zawt i. 21Ciafangin Daniel in kumpibawipa hnenah, “Aw kumpibawi pa, kumzangza in na nung tu seh. 22I Pathian in a vancung mi khiah hlat ai chintit te kaa khiah hen sah manin amahte in i dawp lo i. Ziangmanti fangin Pathian hmai ah mawhhluk tuh nai lo ing. Cen aw kumpibawipa, na lakah khai mawhhluk tuh nai lo ing.”ti in sawn i. 23Ciafangin kumpibawipa khai ang rauh ai Daniel khiah chintit kua songin suah tuhin thu pe i. Ciamanin Daniel khiah chintit kua songin suah ai a ruang vum ah pakhat niu peu khai pem tau lo in tawk i. Ziangmanti fangin amah in a Pathian khiah sang i.
24Ciafangin kumpibawipa in Daniel mawhhluk tu te khiah kawih ruai ai amahte khiah a fate le a nu te kawmin chintit kua ah lon ai a kua hnia rinah tlok man hlan ah chintit te in amahte khiah hlik dek ai amahte ruh tian in a cik niu niu in ek sah sio i.
25Ciafangin Kumpibawipa Darius in:
Laivum pumpalah ai umtu mi hmuahhmuah le
mi phun cang le pon phun caang pong tu mi te hnenah,
Thin nuam ngai in lo um tuu-ih.
26 I ukhnak ram songai mi hmuahhmuah in,
Daniel ai Pathian hmai ah thing biakbo in
kih tuhin thu suah ing.
Ziangmanti fangin amah khiah a nung Pathian i.
Kumzangza in kho i.
A ukhnak khiah zaikom in khai hnawm tuh awng lo i.
A ukhnak khiah a tong tian in kho tuh i.
27 Amah in mite o ai luat ruai i.
Amah in vancung le laivum ah
hnikhnaihhnak le ngaihsun urkul te bawn i.
Daniel khiah chintit te kut songin suah tu i.
28Ciatih bangin Daniel khiah Darius ukhnak songah le Persia mi Sairas ukhnak songah khangso i.