Daniel 2

<<  DANIEL 2  >>

1Nebukhadnezzar khai kumpibawi kum nih tuan fangin, ani khai mang man i. Cia mang in amah khiah thin hnaihnok ruai rauh manin mitmu thill lo in a mitsal i. 2Ciafangin kumpibawipa in mitkher thiamte, arsi sik thiam te, dawi naite le Khaldean te khiah a mang rel ruai tuhin ko tuh in thusuah i. 3Ciafangin kumpibawipa in amahte hnenah, “Mang pakhat man ing. Cia mang khiah zai ti ca i ti ling i nuam rauh i.” ti in rel i. 4Ciafangin Khaldean te in kumpibawipa khiah Aramaic pon in, “Aw kumpibawipa, kumzangza na nung tu seh. Na hnenum te khiah na mang kin rel tu lai na let sah tuh i ing.”ti in sawn i. 5 Ikhalselai kumpibawipa in amahte khiah, “I thukhan hnak khiah thlirh leh thill lo i. Ningte in i mang khiah i rel in let sah ben hlah leisikhaw, ningte khiah a cik niu niu in ning cem tuh sio ai ning inn khiah hnawmborh bangin haih tuh i. 6Ikhalselai i mang khiah i rel in let thiam leisikhaw, ningte in lehsawng le a man le zulhnak ngah tuh i si. Ciamanin i mang le a dikbe i rel tuu-ih.”ti in ruai i. 7Ciafangin amahte in, “Kumpibawipa in a hnenum te khiah a mang man hnak kin rel tu selai, ciafangin na let sah nga ing.” ti in sawn leh thio i. 8Kumpibawipa in, “I thukhan hnak khiah thlirh thill lo ling manin, a can nai ning nuam ngawn khiah a ngaingai in ling ing. 9I mang man hnak khiah i rel ben hlah leisikhaw, ning cawh hnak tuh thu lek um i. Ziangmanti fangin a can bo hlan lo thudon le a lovang thu i rel tuhin lung ning khim tlang i. Ciaman in i mang man hnak khiah i rel tu i lai ciafang ningte in i let sah thiam tuh khiah ling tuh ing. “ti in sawn i. 10Ciafangin Khaldean te in kumpibawipa khiah, “Kumpibawipa ai thu khiah aisu in khai rel thiam tu laivum ah um lo i. Ciamanin aisu kumpibawi le bawi le mi-uk tute in he bang thu khiah mitkher thiam te le arsi sik thiam te le Khaldean te khiah zawt awng lo i. 11Kumpibawipa ruai hnak khiah a har ngai i. Kumpibawipa rel thiam thai pathian te siarlo aisu khai um lo i. Cen cia pathian te lee minung te lakah um lo i.”ti in sawn i. 12Ciamanin kumpibawipa khai thinraw rauh ai Babilon ai mifim te khiah a veksen in rek tuhin a thu suah i. 13Ciamanin kumpibawipa a thu suahhnak bangin amahte in mifim te khiah rek pan ai Daniel le a rualpuite khai rek tuhin sii i.

14Kumpibawipa kiltu te captain Arioch khai Babilon khua ai mifim te rek tuhin feh fangin, Daniel in Arioch hnenah pon thiam ngai in pon ai, 15kumpibawipa kiltu te captain Arioch hnenah, “Zaimanin kumpibawipa ai a thu suah hnak khiah thupui rauh i pa?”ti in zawt i. Ciafangin Arioch in Daniel khiah kumpibawipa ai suah hnak thu khiah rel i. 16Ciamanin Daniel khai kumpibawipa hnenah kawi ai, kumpibawipa mangman hnak khiah let sah thai in a can pe tuh in ngen i.

17Ciafangin Daniel khai a inn ah tlung ai kumpibawipa suah hnak thu khiah a rualte Hananiah le Mishael le Azariah hnenah 18Daniel le a rualpuite khiah Babilon ai mifim te kawm in rek lo hnak tuhin, he thuthup ca in vancung ai Pathian hnenah ngaihhar kun tuhin rel i. 19Ciafangin cia thuthup khiah zanlai ah Pathian in Daniel hnenah hmuh ai Daniel in hmu i. Ciamanin Daniel in vancung ai Pathian khiah hmuifu bur i. 20Ciafangin Daniel in:

   “Pathian hming khiah kumzangza in hmuifu tu seh.
Ziangmanti fang fimhnak le tha khiah amah ai i.

21 Amah in can le tikcu khiah thleng i.
Kumpibawite khiah amah in lon ai,
amah in mi dang khiah kumpibawi cang ruai i.
Amah in mifim te khiah fimhnak pe ai
Linghnak nai te khiah thiam hnak pe i.

22 Amah in a thuk le a thup hnak thu khiah lar ruai i.
Khuathim songai umhnak thil khiah amah in ling i.
Amah songah khuavar um i.

23 Na an le na cuan ing,
Aw i paate ai Pathian;
Nangmah in fim hnak le tha i pe zo i si.
Kinmah ai na ngen hnak thu khiah
tunin kin ling ruai zo i si.
Ziangmanti fangin kumpibawipa ai
zawt hnak thu khiah kin ling ruai zo i si.”
ti in sawn i.

24Ciamanin Daniel khai kumpibawipa in Babilon khua ai mifim te rek tu tuhai dah hnak Arioch hnenah kawi ai amah hnenah, “Babilon khua ai mifim te khiah rek mah. Kumpibawipa hnenah i kawih tulai, kumpibawipa mang khiah let sah tuh ing.”ti in rel i. 25Ciafangin Arioch in Daniel khiah a rang ngai in kumpibawipa hnenah kawih ai, kumpibawipa hnenah, “Judah thawngtla mite lakah kumpibawipa mang man hnak let thiam tu pakhat tawk ing.”ti in rel i. 26Ciafangin kumpibawipa in Belteshazzar ti ai ko hnak Daniel hnenah, “I hmu hnak i mang khiah i ling ruai in i let sah ben tuh i sim?”ti in zawt i. 27Ciafangin Daniel in kumpibawi pa khiah, “Kumpibawipa ai zawt hnak thuthup khiah mifim te le arsi sik thiam te le mitkher thiam te le pol te in kumpibawipa khiah rel ben lo i. 28Ikhalselai vancung ah thuthup te lar ruai thai tu Pathian pakhat um i. Cia Pathian in Kumpibawipa Nebukhadnezzar hnenah tunhnua lamah cang tuh hnak thu khiah na ling ruai i. Na khuahluan vumah na mangman hnak le na lu songai Pathian ai na hmuh hnak khiah hete i: 29Kumpibawipa, nangmah khiah khuahluan vumah na zau teng fangin, he hnua ah zai cang tuh i ni ti in na thin songin ruat i si. Ciamanin thuthup lar ruai tu pa in a cang tuh hnak thu khiah na ling ruai i. 30Ikhalselai kaimah khiah mi dangte hnakin i fim sawn manin he thuthup khiah i ling ruai lo i. Ikhalselai kinmah ca manin kumpibawipa nangmah in na thin songai ruathnak khiah na ling thai in amah in he a dikbe khiah na ling ruai i.

31Kumpibawipa, nang khai khuahlir le mizuk lian ngai hmu i si. He a lian ngai, a mawi ngai mizuk khiah na hmai ah ding ai, a hmuihmel khiah laukul rauh i. 32Cia mizuk lu khiah a pha rauh sui i. A sohnar le a ban te khiah ngun tangka i. A pumpui le a kawngpui te khiah dar i. 33A ke te khiah thir i. A keruh te khiah a hrek thir i ai a hrek khiah laisawr i. 34Ciatih ai na sik teng in, kut thawn ai khuar lohnak lungto pakhat in cia zuk ai thir le laisawr keruh khiah kha le a zuk pui khiah a veksen in a cik niuniu in zaan sio i. 35Ciafangin cia thir le laisawr le dar le ngun le sui khiah hmunkhat in rial sio ai rongkhawm cuu ai rongcil hmun khang ai vaikung bangin nawi sio i. Ciafangin ciate khiah hlivua in lan berh ai pakhat niu bang khai tang nawn lo i. Cia mizuk kha tu lungto khiah mual lianpui ah khang ai laivum pumpalah dim i.

36Cia khiah na man hnak na mang i. Tun a dikbe khiah kumpibawipa na rel tuh ing. 37Aw kumpibawipa, nangmah khiah kumpibawite lakah kumpibawi i si. Ziangmanti fangin vancung ai Pathian in nangmah khiah kumpibawi ram le power le tha le thangphathnak na pe zo i. 38Khuato hmun caang ai minung te le, lo lai ai ramsa te le van vumai vaniu te khiah Pathian in na kut song ah na pe zo ai amahte uktu tuh in na bawn zo i. Nangmah khiah he mizuk sui thawn bawnhnak lu i si. 39Ikhalselai na hnua ah nangmah ram tahin nauta sawn kumpibawi ram suak tuh i. Ciaben fangin a dang kumpibawi ram pathum hnak dar kumpibawi ram suak tuh i. Cia kumpibawi ram in laivum hmuahhmuah uk tuh i. 40A pali hnak kumpibawi ram khiah, thir in zai hmuahhmuah khiah nawi lio in khoi ruai ai peu ruai bang in, cak tuh ngai i. Zai hmuahhmuah khoi ruai tu thir bang in, cia kumpibawi ram in a dang ram hmuahhmuah khiah khoi ruai tuh i. 41Cen a keruh le a ke zungte khiah a hrekkhat khiah bel bawntu pa laisawr bang le a hrekkhat khiah thir bang in na hmu bang in, cia kumpibawi ram khiah khan tuh i. Ikhalselai thir le a emhnak laisawr khiah a rawih in um in na hmu bang in, cia ramah khiah thir bang in cak tuh i. 42Cen a keruh le a kezung te khiah a hrekkhat thir le a hrekkhat laisawr i manin, cia kumpibawi ram khiah a hrekkhat khiah cak bik tuh ai a hrekkhat khiah cak lo bik tuh i. 43Thir khiah a emhnak laisawr thawn rawih dun khiah na hmu bangin, amahte khiah hmun khat in pawl dun tuh i. Ikhalselai thir le laisawr khiah kop thill lo bangin, amahte khiah pakhat le pakhat kop dun tuh lo i. 44Hete kumpibawite niakhua ah vancung ai Pathian in kumpibawi ram pakhat suak ruai tuh ai cia ram khiah zaikom in khai hnawm tuh nawn lo i. Cia kumpibawi ram khiah mi dang te hnenah pe tuh lo ai cia kumpibawi ram in he kumpibawi ram te khiah a veksen in khoi ruai tuh ai a veksen in hnawmcan tuh sio i. Ciafangin cia kumpibawi ram khiah kumzangza in um tuh i. 45Cia lungto khiah mualtlang songin kut lo in khuar ai, thir le dar le laisawr le ngun le sui te khiah a cik niuniu in zaan ruai bangin, tunhnua ah cang tuhhnak thu khiah a lian Pathian in kumpibawipa khiah ling ruai i. Cia na mang man hnak khiah a hman i. Cen a dikbe let hnak khai a peupeu i.”ti in rel i.

46Ciafangin Kumpibawipa Nebukhadnezzar khai Daniel hmai ah bok ai, Daniel hnenah lehsawng le rimhmui hlu tuhin thu pe i. 47Ciafangin kumpibawi pa in Daniel hnenah, “Nangmah in he bang thuthup rel thiam tu na Pathian khiah pathiante lakah Pathian i. Cen amah khiah kumpibawite Bawipa le thuthup lar ruai tu i.”ti in sawn i. 48Ciafangin kumpibawipa in Daniel khiah do ai lehsawng a lian ngaingai tam ngai sum le Daniel khiah Babilon ram uktu tuhin le Babilon ai mifim te uktu tuh in dah i. 49Cen Daniel in khai kumpibawipa hnenah, Shadrak le Meshak le Abed-Neko khiah Babilon ram uktu tuh in dah tuhin ngen i. Ikhalselai Daniel tu kumpibawipa kawl dawngkham ah um hlen i.

<<  DANIEL 2  >>