2 Samuel 1

<<  2 SAMUEL 1  >>

1Saul thi hnua ah David khai Amalek te rek ben ai letleh fangin, Ziklak ah ni nih um i. 2Ni thum nia fangin, mi pakhat khiah Saul camp in suak i. Cia pa pon khai zik bial ai a lu ah khai laivut um i. Ani khai David hnenah kawi fangin, laipua ah bok ai David khiah bia i. 3Ciafangin David in amah hnenah, “Konin hleng i si?” ti in zawt i. Amah in, “Israel mite camp songin suak ngah teu ing.” ti in sawn i. 4Ciafangin David in amah hnenah, “A thu akontih i pa, i rel tu?” ti in zawt i. Cia pa in, “Mite khiah raaltawng hmunin tlan ai mi tam ngai khai thi i. Saul le a fapa Jonathan khai thi ve i.” ti in rel i. Ciafangin David in cia thu reltu tlangval pa hnenah, “Saul le a fapa Jonathan thi lio tu akontih ai ling i si?” ti in zawt i.  6Cia thurel tu tlangval pa in, “Kai khai Kilboa Mual vumah lo kawi ngah le ciafang in Saul khiah a fei pui hngai in ding i. Saul khiah siphuh leng le siphuh totute in hnawh dek i. 7Saul khai a hnualam her fangin i hmu ai, i ko i. Ciafangin kai in, ‘Heta ah ing.’ ti in sawn ing. 8Ciafangin Saul in, ‘Aisu i si?’  ti in i zawt  i. Kai in, ‘Amalek mi ing.’ ti in sawn ing. 9Ciafangin amah in i hnenah, ‘I vumah ding tulai i rek tu. Ziangmanti fangin i nung napui ai i ur rauh ze i.’ ti in i ti i. 10Ciamanin kai khai a vumah dingai rek ing. Ziangmanti fangin amah khiah tlu zo manin nung tuhin um bul lo ing. A lu ai kumpibawi lukhuk le a baan ai ngun khiah lang ai heta ah i bawipa hnenah na kawih sah ing.” ti in ti i. 11Ciafangin David khai a thuam khiah zik ai ciatih bangin a hnenai umtu mi hmuah in bawn ve i. 12Anite khai zanlam tian Saul le a fapa Jonathan le Bawipa minungte le Israel mite ca in lungsia in kap tlang i. Ziangmanti fangin amahte khiah vangsau thawn thi tuar i.

13Ciafangin David in a thureltu tlangval pa khiah, “A kon in i si?”ti in zawt i. Amah in, “Kaimah khiah ramdang mi Amalek fapa ing.” ti in sawn i. 14Ciafangin David in amah hnenah, “Akontih ai na kut khiah Bawipa rilhnak pa rek tuhin suah tuh khiah lo na lau lo i?” ti in ti i. 15Ciafangin David in amah te songai tlangval pa pakhat khiah ko ai, “He pa khiah rek tu.” ti in ti ai cia pa in ani khai rek i. 16David in amah hnenah, “Na thi khiah na lu ah um tu seh. Ziangmanti fangin, ‘Bawipa rilhnak pa khiah rek zo ing.’ ti in na ka in ponghnak in nangmah lakah tetti na khan i.” ti in ti i.

17Ciafangin David in Saul le a fapa Jonathan khiah hetih bangin kah-la siar ai 18Judah mite khai he kahpuk kah-la khiah cuk tuhin ruai i.(Cia khiah Jasher ca-uk songah khumhnak i.)

19 “Israel mawihnak khiah  na hmunsaang vumah rek te i.
Akontih in miliante khiah thi te i!

20 Kath ah rel mah ih.
Askelon ah phuang mah ih.
Cialo fangin Filistin fenute in ang mawh ngai!
Vunpar cem lote fenute in hngal mawh ngai!

21 Kilboa mualtlangte, ning vumah
naidawh le ruah khai si ma seh.
A hlute khai pe nawn ma seh.
Ziangmanti fangin ciata ah milian pa lum
khiah zakthi kul in lon sah i.
Saul lum khiah thau noih lo in lon sah i.

22 A rekhnak te thi hnen in le   miliante thau hnenin,
Jonathan kahpuk khiah letleh lo i.
Saul vangsau khiah a lolek in tlung lo i.

23 Saul le Jonathan khiah a nung lai in
a mawi le hmuh hiam ngai i.
A thi fangin khai khek lo i.
Mudok hnak in amahte khiah rang sawn i.
Chintit hnak in cak sawn i.

24 Ning Israel fenute, ponnum le a dang ning
daihhnak thil ning  silh tu le  ning thuam par ah
sui thawn ning cawih sah tu Saul khiah kah   tuu-ih.

25 Akontih bangin milian te khiah
raaltawng hmunah thi te i!
Aw Jonathan, na saang bik teng in na rek lio i.

26 I unau Jonathan, nangmah ca in thin i thip rauh i.
I hnenah na pha rauh i.
Na ithnak khiah nupang ithnak tahin   pha sawn i.

27 Akontih in milian te khiah thi lio i.
Akontih in raaltawnghnak thilri khai  hnawmberh i!”

<<  2 SAMUEL 1  >>