1 Chronicles 29

<<  1 CHRONICLES 29  >>

1Ciazolo ah Kumpibawipa David in pawlpuite hnenah, “Pathian lek ai rilhnak i fapa Solomon khiah tlangval niu manin za khai thiam lai lo i. Cen he temple khiah minung ca i lo ai Bawipa Pathian ca i manin naper lian ngai i. 2I Pathian inn tuhin i ben tawp in pai zo ing. Sui thilri ca in sui, ngun thilri ca in ngun, dar thilri ca in dar, thir thilri ca in thir, thing thilri ca in thing, onyx lungto, lungto pianzia phuncang le lungvar mankhung a phun cangcang le lungtlepte khiah a tam rauh in pam zo ing. 3Ciazolo ah i Pathian inn khiah i it ze manin, he inn cianghlim ca ai i pamhnak thilri veksen ai zoloah kaimah ai khawlhnak sui le ngun khai i Pathian inn ca in, 4Ophir sui talan thawng thum, a ercia ngun talanthawng sarih khiah innte bangkhang mat tuhin le 5sui thilri ca in sui le ngun thilri ca in ngun le thil bawn thiam te kut in thil hmuahhmuah bawnhnak tuhin pe ing. Ciamanin tunnia ah aisu in Bawipa hnenah amah veve pe nuam tu um i si?”ti in ti i.

6Ciafangin a paate innkua songai upate le Israel hin songai upate le thawng le za vumai raalkap uktu bawite le kumpibawipa naper tu bawite in a siang ngai in pe i. 7Amahte in Pathian inn ca tuhin sui talanthawng nga le thawng ha taric le ngun talan thawng ha le dar talan thawng hlairiat le thir talan thawng zakhat pe i. 8Cen lungvar mankhung nai tute hmuah in Gershon mi Jehiel hnenah Bawipa inn ai tangka khawlhmun ah pe i. 9Ciamanin amahte in a siang ngai in Bawipa hnenah pe manin mite khai ang ngai i. Kumpibawipa David khai ang ngai i.

10Ciamanin David in Bawipa khiah pawlpuite hmai ah hmuifu bur ai, David in, “ Kin Paa, Israel Bawipa Pathian, nangmah khiah kumzangza in hmui na fu i. 11Aw Bawipa, lianhnak le power le thangphathnak le nehhnak le bawihnak khiah nangmah ai i. Ziangmanti fangin vancung ai le laivum ai khiah a vekin nangmah ai i. Kumpibawi ukhnak khiah nangmah ai i, Aw Bawipa, nangmah khiah zaizongza uk tu a lu i si. 12Liathnak le upathnak khiah na hnenin hleng i. A veksen khiah nangmah in uk i si. Na kut songah power le tha um i. Na kut songah mi veksen lian ruaihnak le thacak hnak um i. 13Ciamanin, kin Pathian, na an in na hming khiah na cuan i ing. 14Hetih bangin a siang ngai ai hlu ben tu kaimah le i minungte khai zai i ing? Ziangmanti fangin zaizogza khiah na hnenin hlenghnak i. Nangmah thil khiah na pe leh ngawn i ing. 15Ziangmanti fangin kinte khiah na hmai ah ram dang mi le mikhual i ing. Kin paate khai a veksen in ciabang i ve i. Laivum ah kin nunhnak khiah a hlaa bang ngawn i. Umm tuhhnak um lo i.

16Aw Bawipa Pathian, a cianghlim na Hming ca ai inn na sak tuhai a tam rauh ai kin pamhnak khiah na kut songin hlengai a veksenin nangmah ai i. 17Cen i Pathian, nangmah in mite thinlung khiah cu ai dikcanghnak lakah na ang i ti khai ling ing. Kai ngawn i thinlung dikcang niu thawn hete khiah a veksenin hlu zo ing. Cen tunin heta ai umtu na minungte in a siang ngai ai na hnenah hlu khiah hmu manin i ang ngai i. 18Aw kin paate, Abraham le Issac le Israel te Bawipa Pathian, hetih bangin nuaamhnak khiah na minungte thin songah kumzangza in dah sah tulai, amahte thinlung khiah na hnenah a kungniu in um tuh ngio in dah tu. 19Cen i fapa Solomon in na temple sahnak tuhai i pamhnak thil thawn temple sa thai in na thukham le na tettikhanhnakte le na dan upadite khiah a veksenin a kungniu in hlun thai in thinlung pe tu.”ti in ti i. 20Ciafangin David in pawlpui veksen hnenah, “Bawipa ning Pathian khiah hmuifu bur tuu-ih.”ti in ruai i. Ciamanin pawlpui veksen khai amahte paaate Bawipa Pathian khiah hmuifu bur ai Bawipa hmai ah le kumpibawipa hmai ah bok i.

Solomon khiah kumpibawi cang i

21Ciafangin amahte in Bawipa hnenah raithawi ai a thangha ah mai thawn taihnak a hlu khiah, kawlpaw cang thawng khat, tu cang thawng khat, tu fa niu thawng khat, te khiah ding tuhhnak a hlu kawmin hlu ai Israel mi veksen ca in raithawi i. 22Cia nia ah amahte in Bawipa hmai ah ang ngai in ei le ding i. Amahte in David fapa Solomon khiah a velnihhnak kumpibawi cang ruai ai, Bawipa hmai ah amah khiah mi konghoitu tuhin thau noih ai Zadok khai phungki tuan tuhin thau noih i. 23Ciafangin Solomon khai, Bawipa kumpibawipa tauhkheng vumah to ai a paa David ca in kumpibawi cang ai amah khiah khaang i. Israel mi veksen in a thu ngai i. 24Mi upa hmuah le raalbawi hmuah le Kumpibawipa David fate veksenin khai, Kumpibawi Solomon kuthnia ah lut i. 25Ciamanin Bawipa in Solomon khiah Israel mi veksen hmai ah a rauh ngai in do ai, kumpibawi liathnak khiah a vumah pe manin Israel ah ani hlanah amah bang kumpibnawi um awng lo i.

David thi i

26Ciatih bangin Jesse fapa David in Israel mi veksen khiah uk i. 27Israel mite khiah kum sawmli uk i. Kum sarih khiah Hebron in uk ai kum sawmthum le ku sarih khiah Jerusalem in uk i. 28Ciamanin ani khai kum tar ngai nun sau ngai le milian ngai le upathnak lian ngai thawn thi i. Amah ca in a fapa Solomon in uk i. 29Kumpibawi David bawnhnak khiah a ngom ai panin a bo tian prawfet Samuel ca-uk le prawfet Nathan ca-uk le prawfet Gad ca-uk songah 30a ukhnak le a tha veksen le a hnenah le Israel te hnenah canghnak le ram dang ai kumpibawi veksen hnenah canghnak te kawmin khum liang i.

July 5199810:27p/june192016

<<  1 CHRONICLES 29  >>