1Ciafangin David in a bawi hmuahhmuah khiah Jerusalem ah khawm ruai i. Cia bawite khiah hin songai upate, kumpibawi ca ai napertu uktute, a thawng le a za ai uktu bawite, kumpibawi le a fapate thilri le sumhnam te uktute, kumpibawi inn ai napertu hmuah le mi hmingthang le mi raalphate i. 2Kumpibawipa David khiah ding ai, “I ulenaute le i minungte, i ngai tuu-ih. Bawipa thawn lungkhim dunhnak thingkuang le kin Pathian kefot hmun tuhin, inn sa tuhin tum napui ing. Cen a sa tuhin thilri khai cuum zo napui ing. 3Ikhalselai Pathian in, “Nangmah khiah raalkap na i manin thi luang ruai zo i si. Ciamanin i Hming ca in inn i sak tuh lo i si.” i ti i. 4Ikhalselai Israel Bawipa Pathian in kumzangza in Israel kumpibawi tuhin i innkua veksen lakin i ril i. Judah khiah bawi tuhin ril ai, Judah songin i innkua khiah ril ai, i paate fapa lakin kaimah khiah Israel mi veksen vumah kumpibawi cang tuhin a lungkhim i. 5Cen i fate songin – Bawipa in fapa tamngai i pe i – i fapa Solomon khiah Bawipa kumpibawi ukhnak Israel mite uktu kumpibawi cang tuhin ril zo i. 6Bawipa in i hnenah, ‘Na fapa Solomon in i inn le i tualvante khiah i sak tuh i. Ziangmanti fangin amah khiah i fapa tuhin ril zo ai kaimah khiah a paa i tuh ing. 7Tun bangin thukham le i upadi dante khiah a kho ngai in hlun lekhaw, a ukhnak khiah kumzangza in kho ruai tuh ing.’ti in i rel i. 8Ciamanin he Israel mi veksente le Bawipa mite hmai ah le kin Pathian zak in, na rel ing: He ram pha khiah na co thil thai in le a tesin fate in co tuhin hlup thil thai tuhin, na Pathian Bawipa ruaihnak khiah a khim niu in hlun tuhin ralring tu.
9Cen nang i fapa Solomon, na paa ai Pathian khiah ling tulai, na thinlung ngaingai in a kung niu in a naper sah tu. Ziangmanti fangin Bawipa in mi thinlung hmuah sii sah ai, amahte ruathnak hmuahhmuah khiah ling sah i. Amah khiah sii lesikhaw, tawk tuh i si. Ikhalselai amah khiah zaam lesikhaw, kumzangza in na lon tuh teu i. 10Pathian thingkuang khawi hmun tuh inn sa tuhin Bawipa in na ril zo khiah ruat tu. Ciamanin thahat ngai in sa tu.” ti in rel li.
11Ciafangin David in Solomon hnenah temple kawka le a innte le thilkhawi hmun khante le a cungta khante le, a songlam ai khante le ngaihharhnak tauhkheng umhmun khan zuk suaihnak khiah pe i. 12Cen Ciang Rauhla in David thin songah dah sah bangin, David in Bawipa tualvante le a hiang cingkim ai khan hmuahhmuah le Pathian inn songai tangka khawihmun khan le Pathian hnenah hluhnak thilri khawi hmun khan te zuk suaihnak khai David in Solomon pe i. 13Cen phungkite le Levi te khan dan le Bawipa inn songai amahte naperhnak hmuahhmuah le naperhnak ai hmanghnak thilrite khai a veksenin rel i. 14Cen Pathian biahnak ai hmang tuhhnak sui thawn bawn tuhhnak thilri ca in sui le Pathian biahnak ai hmang tuhhnak tangka thawn ai bawn tuhhnak thilri ca in ngun te khiah teh sah i. 15Sui thawn bawnhnak mai-inn varhmun le sui ai bawnhnak mai-inn ca ai sui le ngun thawn bawnhnak mai-inn varhmun le ngun thawn bawnhnak mai-in ca ai ngun khai teh sah i. 16Pathian ca ai dahhnak sangreu dah hmun cabuaite ca ai sui le ngun thawn bawnhnak cabuaite ca ai ngun le 17rongei hnak fork le hleng le ca ai sui le sui a cit thawn bawnhnak kuakte le sui pakan kumte ca in sui khiah teh sah ai, gun thawn bawnhnak pakan kumte ca in ngun khiah teh sah i. 18Cen rimhmui awlta ca in sui khai teh sah i. Cen amahte ko khiah pharh ai Bawipa thawn lungkhim dunhnak thingkuang khuk tu sui cherubim siphuhleng zuk suaihnak khai pe i. 19David in, “Hete khiah Bawipa in i vumin a kut thawn lai i nganhnak nai ing. Cen he a zuk suaihnak khiah a khim niu in linghnak tuh fimhnak khai i pe i.”ti in ti i.
20Ciafangin David in a fapa Solomon hnenah, “Thahat le raalpha in um tulai bawn tu. Lau mah. Tha sia in khai um mah. Ziangmanti fangin Bawipa Pathian, i Pathian khiah na hnenah um tuh i. Bawipa inn songah Bawipa biahnak ca ai na hmuahhmuah na ben hlan lo amah in na hlum tuh lo i. Na zaam khai na zaam tuh lo i. 21Phungkite le Levi pawl khiah a veksenin Pathian inn songai naper tuhin a cialep i. Cen naper phun caangcaang per tuhin le Pathian biahnak ca ai naper phun caangcaang per tuhin naper thiam le nuamte khiah na hnenah um tuh i. Cen mi upate le mite khiah a veksenin na kuthnia ah um tuh i.”ti in rel i.